سیمه ییز خبرونه
طالبان د اسلام بدنامولو دنده تر سره كوي
له ولسمشرۍ څخه په خپره شوې خبرپاڼه کې د ولسمشر حامد كرزي له قوله ويل شوي، چې طالبانو ته د هغوی د بهرنیو بادارانو لخوا د اسلام د تخریب او بدنامولو دنده ورسپارل شوې ده.
د ولسمشرۍ له مطبوعاتي دفتره په خپره شوې خبرپاڼه کې ويل شوي، چې ولسمشر د غزني د اندړ ولسوالۍ په عبدالرحيم کلي کې د وسله والو له لوري پر مولوي نورالحق حمله په سختو ټکو كې غندلې ده.
د غزني والایت چارواکي وايي:
د سې شنبې په شپه (د وږي ۱۲ ) طالبانو په غزني کې د ۸۵ کلن دیني عالم مولوي نورالحق پر کور برید كړى دى.
خبر پاڼه په ډاگه كوي، چې طالبان پر جوماتونو او د خلکو پر دیني مراسمو بریدونه او د افغانستان د دیني علماوو وژنه د نورو په اشاره تر سره كوي.
ولسمشر حامد كرزي د روانې اوونۍ په پيل كې په ډاگه كړې وه، چې طالبان به د خپلو دغو غیر اسلامي اعمالو د ترسره کولو په خاطر افغان مسلمان ولس ته ځواب ورکوونکي وي.
تر دې دمه وسله والو طالبانو پر دغه دیني عالم د بريد په اړه څه نه دې ويلي.
ويل كيږي، چې مولوي نورالحق او دوه زامن يې په دې بريد كې ټپيان شوي دي.
د يادونې وړ ده، چې په تېرو وختونو کې وسله والو طالبانو يو شمېر هغه دیني علما وژلي، چې د دوی په وینا د حکومت پلويان ول.