یو شمېر سیاسي ګوندونه وایي؛ طالبانو له سیاسي بهیرونو غوښتي، چې خپل استازي د خبرو لپاره ځانګړي کړي؛ خو بیا نورسیاسي ګوندونه د طالبانو او امریکایانو خبرې مبهمې ګڼي او نیوکې پرې کوي.

په داسې حال کې، چې امریکا او طالبانو د افغانستان د سولې پر مهمو خواوو هوکړه کړې؛ خو د دوی تر منځ مبهمې خبرې سیاسي څېرو ته د اندېښنې وړ دي.

د افغانستان د نوې ملي جبهې مشر انوارالحق احدي وایي؛ یو لړ مبهمې خبرې شته، چې د افغانستان راتلونکی زیانمنولی شي؛ خو بیا هم وروستي پرمختګونه هیله بښونکي دي.         

د قطر په ناستو کې طالبانو له افغان حکومت سره  له خبرو انکار کړی؛ خو یو شمېر سرچینو آریانا نیوز ته ویلي، چې طالبانو له سترو سیاسي ګوندونو څخه د مخامخ خبرو اترو لپاره د مرکچيانو ورپېژندنه غوښتې ده.

د ګلبدین حکمتیار اسلامي ګوند لوړپوړی غړی همایون جریر وایي، چې مونږ د طالبانو د اند درناوی کوو؛ د افغانانو تر منځ خبرې باید پراخې او هراړخیزې وي. لدې خبرو باید یو اړخ هم لیرې پاتې نشي او د حکومت ښکېلتیا هم په کې اړینه ده.         

لا تر اوسه طالبانو له سیاسي بهیرونو سره د خبرو اترو په اړه څه ندي ویلي.

سیاسي فعال  نظر محمد مطمئن وایي؛ طالبانو ښکاره ویلي، چې د بهرنیو ځواکونو له وتلو وروسته د افغانستان له سیاسي بهیرونو سره به د نظام پر جوړښت بحث او خبرې کوي.    

سیاسیون باوري دي که د سولې خبرې د افغانانو تر منځ نه وي؛ کومه سوله، چې راځي ماتېدونکې او کړکیچ جوړونکې به وي.

د حزب اسلامي رییس عبدالهادي ارغندیوال وایي؛ که داسې وي، چې د حکومت او مخالفانو تر منځ د سولې خبرې د دواړو اړخونو هوکړه رامنځته نکړي؛ د سولې دا بڼه به په افغانستان کې بلې جګړې ته زمینه برابره کړي.  

دې ټولو ته په کتو د افغانستان د سولې لپاره د امریکا ځانګړي استازي ویلي؛ د سولې د ټینګښت او جګړې د پای ته رسولو لپاره بیړه لري. د هغه په خبره اوس د دې وخت را رسیدلی، چې افغانان په بیړه د سولې رامنځته کولو لپاره له را منځته شوي فرصت کار واخلي؛ خو ولسمشر غني د سولې په هڅو کې پر تدبیر ټینګار کړی او ویلي یې دي نه غواړي، چې پایله یې ناورین جوړونکې وي.