(Last Updated On: وری ۲۵, ۱۴۰۱)په ناټو کې د فنلنډ او سویډن غړیتوب یوه وخت ناشونی ګڼل کېده او د دواړو هېوادونو خلکو له ناټو سره یوځای کېدو ته زړه نه ښه کاوه؛ خو پر اوکراین د روسیې یرغل د دې لامل شو، چې له ناټو سره یوځای کېدو ته لیواله شي.
د جرمني یوې راډیو او تلویزیوني شبکې په یوه مفصل راپور کې، چې له ناټو سره یې د فنلنډ او سویډن د یوځای کېدو په اړه څېړنه کړې، څرګندوي، چې په ۲۰۱۴ کال کې له روسیې سره د کریمیه له یوځای کېدو او د سړې جګړې ناخوالو هم فنلنډ او سویډن دې ته اړ نکړل، چې له ناټو او د شمالي اټلانټیک له تړون سره یوځای شي.
فنلنډ په ځانګړې توګه نه غوښتل، چې خپل ګاونډ روسیه په غصه کړي او تل یې د نړۍ په سیاست کې د ختیځ او لویدیځ تر منځ د پل په توګه کار کړی دی.
فنلنډ دا رول د ۲۰۱۸ کال په هلسنګي کې د روسیې د ولسمشر ولادیمیر پوتین او بیا د امریکا د ولسمشر ډونالډ ټرمپ تر منځ په کتنه کې ترسره کړ؛ خو په وروستیو کلونو کې سویډن او فنلنډ ناټو ته نږدې شوي دي.
د ۲۰۲۲ کال د مارچ په وروستیو کې دواړو هېوادونو په ناروې کې د ناټو په سترو تمریناتو کې ګډون وکړ.
په فنلنډ کې دا اندېښنه مخ په زیاتېدو ده، چې دغه هېواد له روسیې سره د ۱۳۰۰ کیلومټره پولې له کبله ډېر زیانمن شوی دی.
دواړه هېوادونه اوس دې نتیجې ته رسیدلي، چې د ناټو له غړیتوب پرته په بېړني حالت کې د نورو لویدیځو هېوادونو بشپړ پوځي ملاتړ ترلاسه کولی نشي.
د روان کال له جنورۍ راپدیخوا په فنلنډ کې یوې نظر پوښتنې وښودله، چې یوازې ۳۰ سلنه له ناټو سره د یوځای کیدو غوښتنه لري؛ خو د مارچ په پای کې پر اوکراین د روسیې له یرغل وروسته ۶۰ سلنې ته پورته شوه او خلکو له ناټو سره د دې هېواد له یوځای کېدل وغوښتل او دا لیوالتیا مخ پر ډېرېدو ده.
د فنلنډ حکومت د چارشنبې پر ورځ د خپلې بهرنۍ او امنیتي پالیسۍ په اړه یو راپور خپور کړ.
د فنلنډ ولسمشر ساولي نينيسټو ويلي، چې غواړي په ناټو کې د شاملېدو لپآره د هېوادوالو پرېکړه پارلمان ته وړاندې کړي او د اکثريت قانون جوړونکیو رضايت خپل کړي؛ خو واکمن کیڼ اړخي ګوند په ناټو کې د خپل هېواد له غړیتوب سره مخالفت ښکاره کړ.
دغه راز سویډن له ناټو سره د یوځای کیدو پلوي دی.
په سویډن کې هم ډېري خلک خپله دودیز پوځي خپلواکۍ د ویاړ وړ بولي؛ ځکه له تېرو ۲۰۰ کلونو څخه راپدیخوا په جګړه کې ښکېل شوي ندي. دې ناپیلتوب د شلمې پېړۍ له نړیوالو جګړو څخه د سویډن په ژغورلو کې مرسته کړې ده.
په هرصورت د سویډن ډېر خلک اوس غواړي، چې له ناټو سره یوځای شي.
په یوه ټولپوښتنه کې، چې د اوکراین د جګړې له پیل څخه لږ وروسته ترسره شوې، نږدې نیمایي ځواب ویونکیو له ناټو سره د خپل هېواد یو ځای کېدل غواړي، خو یوازې څلورمه برخه یې په ښکاره مخالفت کوي.
په سویډن کې سیاسي وضعیت یو څه پیچلی دی او ټاکل شوې، چې پارلماني ټاکنې په روان مني کې ترسره شي او په دې وروستیو اوونیو کې له ناټو سره د یو ځای کیدو مسله هم مخ پر زیاتېدو ده.
د سویډن د صدراعظمې مګدالینا اندرسن واکمن سوسیال ډیموکراټان په دودیز ډول په ناټو کې د دې هېواد له غړیتوب سره مخالفت لري، خو مخالف ګوندونه له دې مسلې څخه ؛ټه پورته کوي او پر حکومت فشار راوړي، چې انتخاباتي کمپاین پیل کړي.
د سویډن د اپوزیسیون مشر الف کریسټرسن ژمنه کړې، چې که ټاکنې وګټي د ناټو غړیتوب لپاره به غوښتنه وکړي.
دغه راز له ناټو سره د فنلینډ او سویډن یوځای کېدل به د دواړو هېوادونو لپاره خوندي نه وي. روسیې په وار وار د ناټو له غړیتوب سره خپل مخالفت څرګند کړی دی.
د کرملین ویاند دیمیتري پیسکوف په دې وروستیو کې ویلي، چې په ناټو کې د فنلنډ او سویډن غړیتوب کولی شي اروپا بې ثباته کړي.
د روسیې د بهرنیو چارو وزارت ویاندې ماریا زاخارووا د فبرورۍ په وروستیو کې ګواښ کړی و، چې په ناټو کې د دواړو هېوادونو یوځای کېدل به “جدي پوځي او سیاسي پایلې” ولري.
