تازه خبرونه
قطر له افغانستان سره امنیتي تړون ته لیواله دی
(Last Updated On: چنګاښ ۱۹, ۱۴۰۱)
د اسلامي امارت د ملي دفاع وزارت چارسمبالی مولوي محمد یعقوب مجاهد ویلي، چې قطر غواړي له افغانستان سره د امنیتي همکاریو تړون لاسلیک کړي.
مولوي محمد یعقوب مجاهد دا خبره قطر ته له دوه ورځني سفر وروسته، چې د هغه هېواد په رسمي بلنه ترسره شو، کړې ده.
نوموړي ویلي، چې قطر د افغانستان د پولو د ساتنې په برخه کې د دواړو هېوادونو د دفاع وزارتونو ترمنځ د همکارۍ هوکړه لیک لاسلیکولو ته لیوالتیا ښودلې ده.
مجاهد ویلي: په دې اړه به دلته مشوره وکړو او مواد به یې مطالعه کړو.
د ملي دفاع وزارت چارسمبالي دا هم ویلي؛ د قطر له حکومته یې غوښتي، چې د ملي اردو د معاشونو او یونیفورم په برابرولو کې له افغانستان سره همکاري وکړي.
د مولوي مجاهد د څرګندونو له مخې؛ قطر یو اسلامي هېواد دی او له ډېرې مودې راپدیخوا یې له مونږ سره همکاري کړې ده.