سیمه ییز خبرونه
كابل ته د راننوتو پرمهال دوه ځانمرگي بريد كوونكي نيول شوي
په كابل كې پوليسو دوه هغه ځانمرگي بريد كوونكي نيولي، چې د عاشورا د ورځې پرغونډو يې د بريدونو پلان درلود.
د كورنيو چارو وزارت د مسوولينو په وينا:
دا دوه كسان د كابل په ختيځ كې پرداسې مهال نيول شوي، چې كابل ته د ننوتو هڅه يې كوله.
په كابل كې د عاشورا د ورځې د غونډو د امنيت د ډاډمنولو د هڅو په ترڅ كې پوليسو د جمعې په ورځ(د ليندۍ۳) دوه ځانمرگي بريد كوونكي نيولي دي.
د كورنيو چارو وزارت وياند صديق صديقي وايي، چې:
پوليسو د كابل په سروبي ولسوالۍ كې دوه ځانمرگي بريدگر، چې له چاوديدونكيو توكو ډك واسكټونه يې په سراچه موټر كې ځاى په ځاى كړي او كابل ته روان ول، د جمعې په شپه نيولي دي.
د هغه په وينا:
بريدگرو هوډ درلود، چې د عاشورا په مراسمو كې چاودنې وكړي.
صديقي زياتوي، چې:
نيول شويو كسانو په كابل كې د ځانمرگو بريدونو په تنظيم كې هم مستقيمه ونډه درلوده.
هغه د عاشورا د مراسمو گډنوالو او ويرجنو ته سپارښتنه وكړه، چې:
د شكمنو كسانو په ليدو سمدلاسه پوليسو ته خبر وركړي.
دا په داسې حال كې ده، چې تېركال د كابل په ابوافضل زيارت سيمه د عاشورا پر مراسمو ځانمرگي بريد لسگونه كسانو ته مرگ و ژوبله واړوله.