له خپلو اوبو گټه اخيستل د افغانستان حق دى- حامد كرزى

گاونډ هېوادونه بايد وپوهيږي، چې  له خپلو اوبو څخه د پرمختگ او پراختيا لپاره گټه اخيستل د افغانستان حق دى.

افغان ولسمشر حامد كرزى د دغه مطلب په څرگندولو سره وايي، چې:

له خپلو اوبو څخه په گټه اخيستنه كې د افغانستان حق خوړل شوي او حكوت بايد له دې حق څخه استفاده وكړي.

له همدې سره د اوبو او انرژى وزارت وايي:

كه د اوبو د منابعو مديريت ته جدي پاملرنه ونه شي؛ نو افغانستان به د خوراكي توكو له قحطۍ سره مخ شي.

افغان ولسمشر وايي :

كه څه هم افغانستان د ځمكې په تودوخه كې هيڅ رول نه لري، خو په خواشينۍ  له دې اړخه ډېر زيان افغانستان ته رسيږي.

ولسمشر، چې د افغانستان د اوبو د استفادې او پراختيا په درېيم كنفرانس كې يې د سه شنبې په ورځ(د سلواغې۱۰) خبرې كولې وويل، چې:

كه د افغانستان له اوبو څخه په سمه توگه گټه پورته شي، نو راتلونكې كې به مو خوندي وي.

د نوموړي په وينا گاونډ هېوادونه بايد وپوهيږي، چې افغانستان هم د پرمختگ لپاره له خپلو اوبو څخه د گټې اخيستنې حق لري.

د نوموړي په باور له خپلو اوبو څخه د گټې پورته كولو په برخه كې د افغانستان حق د گاونډ هېواونو له خوا خوړل شوى او افغان حكومت بايد دغه حق بيا ترلاسه كړي.

د اوبو او برېښنا وزير محمد اسماعيل خان وايي:

كه څه هم په تېرو لس كلونو كې مو لږ مالي سرچينې په واك كې وې، خو د اوبو د دوه زره كانالونو په جوړولو او بيا رغونې مو د ۴۵۰ زره هكتار ځمكې د خړوب زمينه برابره كړې ده.

دا په داسې حال كې ده، چې د ماليې وزارت د افغانستان د اوبو د تنظيم  او محارولو لپاره اووه ميليارد و پېنځه سوه ميليون دالرو ته خپله اړتيا ښودلې ده .