مالیزیا او قرغزستان له افغانستان سره د ډېر نړیوال تعامل غوښتنه وکړه

مالیزیا او قرغزستان جمهوریت په ګډه له نړیوالې ټولنې څخه وغوښتل، چې په نړیوال ډیپلوماټیک چوکاټ کې د افغانستان د بیا یوځای کولو لپاره کوټلي ګامونه پورته کړي او د بشري حقونو او حکومتدارۍ په مهمو مسلو کې د پرمختګ اړتیا مني.

د مالیزیا لومړي وزیر داتوک سري انور ابراهیم د قرغزستان له ولسمشر صدر جباروف سره په یوه ګډه خبري غونډه کې د دواړو هېوادونو ترمنځ پر ګډ لید‌لوري ټینګار وکړ.

انور، جباروف ته وویل: “زه تاسې سره په دې اړه همغږی یم؛ ځکه، چې افغانستان ته د نږدې هېواد په توګه تاسې [قرغزستان جمهوریت] ښه پېژنئ او مونږ به یقینا ستاسې له مشورې او نظرونو څخه ګټه پورته کړو.”

دا څرګندونې د اسلامي امارت (IEA) تر واکمنۍ لاندې له افغانستان سره د اړیکو په اړه په روانو بحثونو کې وړاندې کیږي، چې د امریکا په ملاتړ د پخواني حکومت له ړنګېدو وروسته د ۲۰۲۱ زېږدیز کال په اګست کې بیا واک ته راستانه شول.

نړیوالې مرستې محدودې ساتل شوي او بشردوستانه بنسټونو د پراخې لوږې او اقتصادي سقوط سره د مبارزې لپاره لږ تر لږه ښکېلتیا ساتلې ده. بیا هم بشپړ ډیپلوماټیک پېژندنه بنده پاتې ده او د اصلاحاتو په تمه ده.

په مارچ میاشت کې د افغانستان د مرستندویه ماموریت (یوناما) مشرې روزا اوتونبایوا د ملګرو ملتونو امنیت شورا ته ویلي؛ اسلامي امارت باید مخکې له دې، چې بېرته له نړیوال سیسټم سره یوځای شي؛ باید نړیوالو مکلفیتونو ته د ښځو د حقونو ساتنې او د ترهګرۍ ضد اقداماتو ته خپله ژمنتیا څرګنده کړي.

دواړو مشرانو د رسنیز کنفرانس پر مهال پراخې سیمه‌ییزې اندېښنې څرګندې کړې. لومړي وزیر انور او ولسمشر جباروف په غزه کې د اسرائیلو روان پوځي عملیات وغندل او دا یې د تېري، استعمار او نسل وژنې یوه بڼه وبلله.

لومړی وزیر انور وایي: “مونږ له اسرائیل څخه د دې تېري درول او د غزې خلکو ته د امنیت او عدالت چمتو کول غواړو، چې له اوږدې مودې راپدېخوا یې رنځ ګاللی دی. دغه راز دوامداره کړاو، د بشري حقونو په ساتلو کې د نړیوالې ټولنې ناکامۍ او د ډېرو لویدیځو هېوادونو د منافقت پایله ده.”

دواړو مشرانو د ایران له هغه حق څخه ملاتړ څرګند کړ، چې دوی یې د اسرائیلو تېری بولي.

دغه راز دوی په منځني ختیځ کې د سولې او امنیت لپاره پر عادلانه او متوازن چلند هم ټینګار وکړ.

انور زیاته کړې؛ هغه له سعودي ولیعهد محمد بن سلمان څخه یو شخصي پیغام ترلاسه کړی، چې د اوربند لپاره یې کلک ملاتړ څرګند کړی او له مسلمانو هېوادونو یې د سولې لپاره همغږي او په غزه کې د دښمنۍ پای ته رسول غوښتي دي.