د افغانستان اسلامي امارت د ویاند مرستیال د پاکستانيو چارواکو وروستۍ څرګندونې، چې ګواکې په افغانستان کې د بریدونو د طرحې ادعا په کې شوې، بې‌بنسه بللې او رد کړې یې ده.

د اسلامي امارت د ویاند مرستیال حمدالله فطرت ویلي؛ اسلامي امارت د ستونزو حل په تفاهم، متقابل درناوي او رښتینې همکارۍ کې ویني، نه په تورونو، احساساتي دریځونو او ګواښونو کې.

فطرت د اسلامي امارت دریځ یو ځل بیا څرګندوي او وایي؛ د افغانستان له خاورې به د هیڅ هېواد پر ضد استفاده ونه‌شي او هیچا ته به هم اجازه ورنه کړ شي، چې په‌خپلو فعالیتونو د سیمې امنیت او ثبات ته زیان ورسوي.

دا په داسې حال کې ده، چې د پاکستان د بهرنیو چارو وزارت د دوشنبې پر ورځ اعلان وکړ، چې په اسلام‌آباد کې یې د افغانستان شارژدافیر سردار احمد شکیب ورغوښتی او د خیبر پښتونخوا ایالت د بنو ولسوالۍ د پولیسو پر پوسته یې د برید پر تړاو خپل اعتراضي لیک ورسپارلی دی.

پاکستان ادعا کړې، چې دغه برید په افغانستان کې طرحه شوی و.

دغه چاودنه د شنبې پر ماښام د خیبر پښتونخوا ایالت د بنو ولسوالۍ د فتح‌خېل په اړوند سیمه کې شوې وه، چې له کبله یې ۱۵ پولیس وژل شوي او څلور نور کسان د یوه ملکي وګړي پر ګډون ټپیان دي.

په افغانستان کې د ملګرو ملتونو مرستندویه پلاوي دفتر(یوناما) په خپل تازه راپور کې ویلي، چې د ۲۰۲۶ز.کال کال په لومړیو درې میاشتو کې شاوخوا ۸۰۰ ملکي وګړي په افغانستان کې د پاکستان د اړوند بریدونو او نښتو له کبله وژل شوي او ټپیان دي.

د راپور له مخې؛ د جنورۍ له لومړۍ څخه د مارچ تر پایه پورې د افغانستان او پاکستان ترمنځ د فرضي ډیورند کرښې په اوږدو کې ۹۵ امنیتي پېښې ثبت او تر ټولو ډېر تلفات په کابل، کونړ او پکتیکا ولایتونو کې رامنځته شوي دي.

یوناما ویلي، چې ښځې او ماشومان هم قربانیانو کې دي.

په راپور کې راغلي، چې د وسلوالو نښتو له کبله له ۷۵۰ څخه ډېر ملکي تلفات مستند شوي، چې د افغانستان امنیتي ځواکونو او پاکستاني پوځ ترمنځ د نښتو پایله ده.

د یوناما د څرګندونو له مخې؛ ۶۴ سلنه تلفات د هوايي بریدونو او ۳۵ سلنه نور د توغندیزو بریدونو له کبله رامنځته شوي دي.

یوناما زیاته کړې؛ د دې نښتو له کبله شاوخوا ۹۴ زره کسان، چې له ۱۳ زره څخه ډېرې کورنۍ کېږي، بې‌ځایه شوي او د خلکو کورونه، ښوونځي، جوماتونه او عامې شتمنۍ زیانمنې شوې دي.

دې ادارې د ۲۰۲۶ ز.کال په مارچ کې د کابل د روږدو د درملنې پر مرکز هوايي برید د دې مودې له تر ټولو مرګونو پېښو څخه بللی دی.

ملګرو ملتونو له پاکستان څخه غوښتي، چې د نړیوالو بشردوستانه قوانینو درناوی وکړي او له ملکي سیمو د هدف ګرځولو څخه ډډه وکړي.

همدارنګه د پاکستان ولسمشر آصف علي زرداري ادعا کړې، چې په پاکستان کې ترهګریز فعالیتونه د افغانستان له لارې او د هند پر ملاتړ ترسره کېږي؛ خو افغان چارواکو تل د پاکستانیو چارواکو دا تورونه رد کړي او د پاکستان ناامني یې د هغه هېواد کورنۍ ستونزه بللې ده.

د نورستان ولایت د رسنیو دفتر ویلي، چې د دغه ولایت په کامدېش ولسوالۍ کې د سختو بارانونو او ږلۍ له کبله سېلابونه راوتلي او د سیمې خلکو ته یې درانده زیانونه اړولي دي.

د یاد دفتر د څرګندونو له مخې؛ سېلابونه د کامدېش ولسوالۍ د نانګل په کلي کې راوتلي، چې له کبله یې شاوخوا ۷۰ څاروي، لکه: غواګانې، خوسکي، وزې او پسونه له منځه تللي دي.

د سیمې اوسېدونکي وایي؛ وروستیو بارانونو او ږلۍ د خلکو مالدارۍ ته پراخ زیانونه اړولي او یو شمېر کورنۍ یې له اقتصادي ستونزو سره مخ کړې دي.

هغوی له اړوند ادارو او مرستندویو بنسټونو غوښتنه کړې، چې له زیانمنو شویو کورنیو سره بېړنۍ مرستې وکړي.

د نورستان رسنیز دفتر هم د دې پېښې په اړه د خواشینۍ له څرګندولو سره ویلي؛ اړوندې ادارې به د زیانونو د ارزونې او د اغېزمنو کورنیو د ستونزو د حل لپاره لازم هڅې وکړي.