تازه خبرونه
مسعود اندارابي د کورنیو چارو وزارت د سرپرست په توګه وټاکل شو
ولسمشر او اجرائیه رییس ته نږدې سرچینو آریانا نیوز ته ویلي، چې مسعود اندارابي د کورنیو چارو وزارت د سرپرست په توګه ټاکل شوی دی.
ښاغلی انداربي له دې مخکې د ملي امنیت د سرپرست او مرستیال په توګه دنده تر سره کړې ده.
ولسمشر غني د روان کال د مرغومې پر دوه یمه د کورنیو چارو وزارت پخوانی وزیر ویس احمد برمک لیرې او د هغه پر ځای یې امرالله صالح د دغه وزارت د سرپرست په توګه دغه وزارت ته وروپېژنده.
د ښاغلي امرالله صالح له استفعا وروسته، د کورنیو چارو وزارت چارې د ولسمشر د ملي امنیت سلاکار حمدالله محب سمبالولې.
امرالله صالح د دغه وزارت مخکینی سرپرست له ۲۷ ورځو وروسته استعفا وکړه او د راتلوونکي کال په ولسمشریزو ټاکنو کې د ولسمشر غني د لومړي مرستیال په توګه راڅرګند شو.
دا په داسې حال کې ده، چې له دغې ټاکنې څو ورځې مخکې ولسمشر غني د کورنیو چارو وزارت درې لوړپوړي چارواکي له دندې لیرې کړل او پر ځای یې نوي کسان دغه اړوند دندو ته وروپېژندل.