تازه خبرونه
ملابرادر د کندوز ولایت د سپینزر دولتي شرکت چارې وارزولې
د ریاست الوزراء اقتصادي مرستيال ملا عبدالغني برادر پرون (چارشنبه د وږي ٢٩ ) کندوز ولايت ته په سفر کې له سپینزر دولتي شرکت څخه لیدنه وکړه.
د ریاست الوزراء اقتصادي مرستیالۍ په ایکس پاڼه کې لیکلي، چې یاد دولتي شرکت اوس پر عصري وسایلو سمبال شوی او د خامو توکو د برابرولو تر څنګ په دې شرکت کې سلګونو کسانو ته د کار زمینه هم برابره شوې ده.
اوس دا شرکت پنبه، نباتي غوړي، کنجاړه، د ځان او کالیو منځلو صابون، کاغذي دسمالونه، موسمي یخ او پر بېلابېلو کچو پلاستيکي بوتلونه تولیدوي.
ویل کیږي، چې ملا برادر د یاد شرکت فعاليت با ارزښته ياد کړ او د اړوند مسوولینو له ترسره شویو هڅو يې ستاینه وکړه.