بی بی سی پښتو
ملي امنیت: تر اوسه ۹۳۳ طالب بندیان خوشي شوي
د افغانستان د ملي امنیت شورا وايي، په تېرو دوو ورځو کې یې ۸۳ نور طالب بندیان خوشي کړي چې په دې سره د ټولټال خوشي شویو طالب بندیانو شمېر ۹۳۳ تنو ته رسېږي.
د ملي امنیت شورا پر فېسبوک پاڼه کابو هره ورځ د خوشي شویو طالب بندیانو انځورونه او شمېرې خپرېږي. دغه اداره وايي، تېره ورځ (چارشنبه، غویی ۱۷مه) ۳۱ او وړمه ورځ ۵۲ طالب بندیان له څري پله زندانه خوشي شوي دي.
د یادې ادارې په وینا، “د ولسمشر محمد اشرف غني د فرمان پربنسټ، د سولې بهیر د هڅو او له کرونا وېروس سره د ښې مبارزې په موخه د طالب بندیانو د خلاصون لړۍ د هغوی روغتیایي وضعیت، عمر او د بند پاتې مودې ته په کتو سره دوام لري.”
وړاندې د ملي امنیت شورا ویاند ویلي وو “پر طالبانو غږ کوو، چې د برمته کړو ولسي او پوځي خلکو د خوشي کولو لړۍ چټکه او تاوتریخوالی کم کړي، څو د ۱۵۰۰ زندانیانو تر خلاصون وروسته د سولې مخامخ خبرې له ځنډ پرته پیل شي.”
د ملي امنیت شوار وايي، د افغانستان اسلامي جمهوري دولت پر طالبانو غږ کوي، چې د حکومت له خوا د ورسپارل شوي لېست سره سم، د امنیتي ځواکونو غړي او هغه ولسي خلک چې طالبانو تښتولي، له ځنډ پرته خوشي کړي.
وړمه ورځ، وسلوالو طالبانو شل تنه زندانیان د کندهار شاولیکوټ ولسوالۍ کې خوشي کړل.
- ځانګړې پاڼه: د افغان سولې بهير
- خلیلزاد له ملا برادر سره د بندیانو په چټک خلاصون غږېدلی
- شاهین: طالب او امریکايي استازي قطر کې پر مهمو موضوعاتو غږېدلي
- امریکا او طالبان به څومره په خپلو ژمنو کې بریالي وي؟
- ملي امنیت: کابل کې مو د “داعش او حقاني شبکې ګډ مرکز” له منځه وړی
د امریکا او طالبانو د سولې تړون له مخې د افغانانو خپلمنځي خبرو لپاره افغان حکومت د طالبانو پنځه زره او طالبان د حکومت زر بندیان خوشي کوي.
طالبانو تر اوسه د حکومت تر ۱۲۰ ډېر بندیان خوشي کړي دي.
په ورته وخت کې، د افغان سولې لپاره د امریکا ځانګړي استازي زلمي خلیلزاد په قطر کې د طالبانو د سیاسي دفتر له مشر ملا برادر سره د بندیانو د خلاصون په بهیر چټکولو غږېدلی دی.
د طالبانو د قطر دفتر ویاند سهیل شاهین پر ټوېټر لیکلي، په دې خبرو کې د قطر د بهرنیو چارو وزارت له ځانګړي استازي مطلق القحطاني سره هم د بندیانو د چټک خلاصون او د بین الافغاني مذاکراتو د پیل او د امریکا- طالبانو ترمنځ د هوکړې د بشپړ تطبیق په اړه بحث شوی.