تازه خبرونه
ملګرو ملتونو د افغانستان لپاره ځانګړی ترکی همغږي کوونکی وټاکه
د ملګرو ملتونو عمومي منشي انتونیو ګوترش د ترکیې پخوانی سفیر فریدون سینیرلي اوغلو په افغانستان کې د خپل ځانګړي همغږي کوونکي په توګه ټاکلی، چې په دې کې له اسلامي امارت سره د چلند خپلواکه ارزونه وړاندې کړي.
د ملګرو ملتونو د عمومي منشي تېره ورځ په ډاګه کړې، چې د سینیرلی اوغلو ټاکنه د دې ټولنې د امنیت شورا د ۲۶۷۹ نمبر پرېکړه لیک پر بنسټ تر سره شوې ده.
د ملګرو ملتونو عمومي منشي له سینیرلي اوغلو څخه غوښتي، چې د افغانستان د وضعیت د خپلواکې ارزونې مشري وکړي او د افغانستان پر وړاندې د موجودو ننګونو د حل لپاره د یوې همغږې او واحدې تګلارې په اړه وړاندیزونه وړاندې کړي.
نوموړی په داسې حال کې ټاکل کیږي، چې د ۲۰۲۱ کال له اګست راپدیخوا، چې اسلامي امارت یو ځل بیا په کابل کې واکمن شو؛ دا هېواد له سختو کړکېچونو سره مخ دی.
د ملګرو ملتونو د سرمنشي ویاند ستیفن دوجاریک ويلي: د ملګرو ملتونو عمومي منشي فریدون سینیرلي په افغانستان کې د ځانګړي همغږي کوونکي په توګه ټاکلی دی. له هغه څخه غوښتل شوي، چې په افغانستان کې شته ننګونې کنټرول کړي؛ ځکه مونږ پوهیږو، چې دغه ترکي دیپلومات پخوا په افغانستان کې و او ښه تجربه لري او کولی شي د افغانستان وضعیت ښه درک کړي.
د ملګرو ملتونو د عمومي منشي مرستیال مارتین ګریفیتس، چې ایران ته پر سفر تللی؛ په افغانستان کې د ملګرو ملتونو د پروګرامونو په اړه په یوه خبري غونډه کې وویل، چې په افغانستان کې د ښځو د زدهکړو او فعالیتونو حق ته باید درناوی وشي.
د ګریفیتس د څرګندونو له مخې؛ مرسندويه هېوادونه باید له افغانستان سره د ۴،۶ میلیارد دالر مرسته وکړې، چې په نړۍ کې د بشري مرستو تر ټولو لویه اندازه ده. د افغانستان غیر معمولي شرایطو ته په پام سره، دا د حیرانتیا خبره نه ده، چې په دغه هېواد کې ۱۶ میلیون وګړي بشري مرستو ته اړتیا لري.
ګریفیتس زیاته کړې: کله، چې بشري ناورین رامنځته شي؛ ښځې او ماشومان په هره ټولنه کې تر ټولو زیانمنونکي دي. طالبان ( اسلامي امارت) باید خپل مسوولیتونه ادا کړي او هغه هېوادونه، چې ژمنې یې کړي باید خپلې ژمنې پوره کړي او په دې برخه کې مرسته وکړي. د افغانستان خلک پخپله په دې برخه کې مسوولیت لري، چې د بهرنیو مرستو له انحصار پرته د خپل هېواد د چلولو لپاره یو څه وکړي.
اسلامي امارت په افغانستان کې د ملګرو ملتونو د نوي همغږي کوونکي د ټاکلو په اړه څه ندي ویلي؛ خو د ملګرو ملتونو نوی همغږي کوونکي ته به د اسلامي امارت او ملګرو ملتونو ترمنځ د ښو اړیکو او همغږۍ رامنځته کولو په برخه کې یو ستونزمن ماموریت وي.
دغه ترکي ديپلومات په نړيوالو چارو او ديپلوماسۍ کې څلور لسيزې تجربه لري او په دې موده کې يې په سياسي، بشري، پرمختيايي او بشري حقونو پر مسايلو کار کړی دی. نوموړی له ۲۰۱۶ څخه تر ۲۰۲۳ کال پورې په ملګرو ملتونو کې د ترکیې دایمي استازی و.
تازه خبرونه
د سیمې هېوادونه باید په ګډه ثبات او پرمختګ ته زمینه برابره کړي – مولوي عبدالکبیر
د ریاست الوزراء سیاسي مرستیال په کابل کې د قزاقستان د لومړي وزیر له مرستیال سره په کتنه کې ویلي، چې د سیمې هېوادونه باید په ګډه د سترو سیمهییزو پروژو په پلي کولو کې ونډه واخلي.
د ریاست الوزراء سیاسي مرستیالۍ د خبرپاڼې له مخې؛ په دې ناسته کې مولوي عبدالکبیر د قزاقستان پانګوالو ته بلنه ورکړه، چې په افغانستان کې پانګونه وکړي.
نوموړي زیاته کړې؛ اسلامي امارت د افغانستان پولې په بشپړ ډول کنټرول کړي، نشهيي توکي او فساد یې له منځه وړی او خپلواک ملي حاکمیت ټینګ شوی دی.
د قزاقستان د لومړي وزیر د مرستیالۍ د خبرپاڼې له مخې؛ په افغانستان کې د اسلامي امارت له لوري د شویو پرمختګونو قدرداني کړې او څرګندوي، چې هېواد یې له افغانستان سره اوږد مهاله سوداګریزو اړیکو، ټرانزیټ او اوږدمهاله پانګونې ته چمتو دی.
ژومانګارين افغان ځوانانو ته د تحصيلي بورسونو د ورکړې د چمتوالي ترڅنګ زياته کړې، چې افغانستان اوسمهال په سيمه کې د يوه سولهييز هېواد بېلګه ده او له همدې کبله له اسلامي امارت سره په بېلابېلو برخو کې د اړيکو ټينګول غواړي.
د قزاقستان لومړي وزير مرستيال دغه راز د کابل او الماتا ترمنځ د مستقيمو الوتنو د پيل غوښتنه وکړه او څرګندوي، چې هېواد يې له افغان حکومت سره په فرهنګي برخه کې دوه اړخيزو همکاريو ته چمتو دى.
اسلامي امارت په تېرو درې کلونو کې پرلهپسې ټینګار کړی، چې په ټول افغانستان کې د امنیت له رامنځته کیدو سره د سترو اقتصادي پروژو پلي کېدا ته له بل هر وخت ډېره ښه زمینه برابره شوې او اړتیا ده، چې افغانستان د سیمې هېوادونه سره ونښلوي.
تازه خبرونه
له پاکستان څخه دې د افغان کډوالو د جبري ایستلو چټکتیا راکمه شي
د سره صلیب یوه لوړپوړي چارواکي د پاکستان له حکومته غوښتي؛ د افغان مهاجرینو د جبري ایستلو چټکتیا دې راکمه شي، چې ښه لاسرسي ورته شونی شي.
د سره صلیب او سرې میاشتې ټولنې د آسیا او پاسیفیک څانګې مشر الکساندر مټیو په دوحه کې خبریالانو ته ویلي، چې له پاکستان څخه د راستنیدونکیو افغان کډوالو پر وړاندې یوه ننګونه دا هم وه، چې په کابل کې یې د اسلامي امارت له چارواکو سره پرې خبرې کړې دي.
هغه زیاته کړې: تاسې پوهیږئ، چې په وروستیو میاشتو کې له نیم میلیون څخه ډېر خلک له پولې څخه را تېر شوي او شونې ده، چې مونږ به په راتلونکیو میاشتو کې د نويو راستنیدونکیو لوی شمېر وګورو.
د هغه د څرګندونو له مخې؛ دا له ۲۰۱۷ کال وروسته په آسیا کې د میانمار او بنګله دیش تر منځ د وګړو ترټولو لوی حرکت دی.
پاکستان د تېر کال له اکتوبر میاشتې راپدیخوا له ۵۰۰ زره ډېر بې اسناده افغان کډوال جبري راایستلي دي.
مټیو زیاتوي، چې ډېري راستانه شويو کسانو له لسیزو راپدیخوا په پاکستان کې ژوند کړی او له حکومت او نړیوال ملاتړ پرته په افغانستان کې د نوي ژوند پیلولو ته چمتو ندي.
د نوموړي د څرګندونو له مخې؛ د راستنېدونکیو نيمايي برخه ماشومان دي، چې په کې د خوارځواکۍ پېښې هم زياتوالی لري.
تازه خبرونه
ترکمنستان د ټاپي پروژې بشپړولو ته ژمن دی – امانوف
د ټاپي پروژې اجرائیوي مشر ویلي، چې ترکمنستان د افغانستان له لارې پاکستان او هند ته د ګازو د نللیکې پروژې بشپړولو ته ژمن دی.
د ټاپي پروژې اجرائیوي مشر محمد میرات امانوف په پاریس کې د انرژۍ په اړه د ترکمنستان د پانګونې غونډې ته څرګنده کړې، چې هېواد یې د ټاپي پروژې په برخه کې له نړیوالو قوانینو سره سم پرمختګ کړی دی.
هغه وایي: ترکمنستان د ټاپي د طبیعي ګاز نللیکې جوړولو په برخه کې د پام وړ پرمختګ کړی، چې موخه یې جنوبي آسیا ته په کال کې ۳۳ میلیارډ مټر مکعب ګاز رسول دي.
امانوف دا ټینګار هم کړی، چې په ترکمنستان کې د ګازو د نللیکې د غځولو چارې بشپړې شوي او اوس له نړیوالو معیارونو سره سم له دغه هېواده بهر هم د دغې پروژې په اړه خبرې روانې دي.
د ټاپي پروژې اجرائیوي رییس همداراز څرګنده کړې، چې د طبیعي ګازو له کارولو سره به په هوا کې د کاربن ډای اکساید ګازو د خپرېدا کچه راټیټه شي.
-
نړۍ3 days ago
د فلسطین پر رفح ښار اسرائیلي ځواکونو د ځمکنيو بریدونو ګواښ وکړ
-
لوبی3 days ago
اټکانرژۍ لوبډلې په نهمه سیالۍ کې سرخپوشانخوافي ته ۱ـ ۰ ماتې ورکړه
-
سیمه ییز خبرونه4 days ago
د غزې په شمال کې د قحطۍ خطر ډېر دی
-
سیمه ییز خبرونه3 days ago
امریکا دې د بشري حقونو په اړه دوه ګوني سیاست ودروي – ترکیه
-
لوبی4 days ago
ابو مسلم فراه اوومه لوبه له خراسان فاریاب لوبډلې څخه ۶ د صفر پر توپیر وګټله
-
تازه خبرونه11 hours ago
ترکمنستان د ټاپي پروژې بشپړولو ته ژمن دی – امانوف
-
سیمه ییز خبرونه12 hours ago
په عراق کې به همجنسبازان پر۱۵ کاله بند شي –پارلمان
-
لوبی9 hours ago
په افغانستان اتلانو لیګ کې موج ساحل ۲-۱ سرسبز یاشلر او سورخ پوشان ۶ -۰ میوند مات کړل