ملګري ملتونه د دویم پړاو ټاکنو لپاره چمتوالی نیسي

په افغانستان کې د ملګرو ملتونو استازوالۍ ویلي، چې که ټاکنې دویم پړاو ته ولاړې شي؛ دغه بنسټ به له ټولو ممکنه لارو کار واخلي، چې د ټاکنو خپلواک کمیسیون ژر تر ژره بیا ټاکنې ترسره کړي.

داسې ښکاري، چې ولسمشریزې ټاکنې په لومړي پړاو کې بریالی نلري او یو ځل بیا به ولسمشر غني او داکتر عبدالله  عبدالله د ټاکنیزې سیالۍ ډاګر ته ورودانګې.

په افغانستان کې د ملګرو ملتونو استازولۍ  مرستیال توبي لینزر وایي؛ برخلیک ټاکنونکې پرېکړه باید د ټاکنیز شکایتونو کمیسیون وکړې. که ټاکنې دویم پړاو ته ولاړې شي دغه دفتر به له ټولو ممکنه لارو کار واخلي، چې د ټاکنو خپلواک کمیسیون ژر تر ژره بیا ټاکنې ترسره کړي.

د ټاکنو خپلواک کمیسیون ویاند میرزا محمد حق پرست ویلي، چې د دویم ځل ټاکنو د ترسره کیدو لپاره پوره چمتوالی لري؛ خو د ژمي په موسم کې د ټاکنو ترسره کیدل ناشوني دي.

د ټاکنیزو شکایتونو کمیسیون غړی قطب الدین رویدار ویلي، اوس نور وخت هم لرو او دا به له وخت مخکې وي، چې د ټاکنیزو شکایتونو پر پرېکړه خبرې وکړو.

که څه هم ډېري باوري دي، چې ټاکنې دویم پړاو ته ځي.

د ټاکنود خپلواک کمېسیون پخوانی رییس دوواد علي نجفي ویلي، چې که د ټاکنیزو شکایتونو خپلواک کمیسیون له خپلو قانوني صلاحیتونو سرغړونه وکړي؛ پرته له شکه ټاکنې دویم پړاو ته ځي.        

که د ولسمشریزو ټاکنو په لومړی پړاو کې هیڅ یو نوماند پنځوس جمعه یوه رایه پوره نکړې؛ د قانون له مخې د وروستۍ پایلې له اعلان وروسته دویم پړاو ټاکنې ۱۵ ورخې وروسته ترسره کیږي.

څارونکې بنسټونو ویلي، چې د ټاکنو کميسیون د دویم پړاو ټاکنو د ترسره کیدو وړتیا نلري.