تازه خبرونه
نوی منتخب ولسمشر به د راتلونکې دوشنبې په ورځ د لوړې مراسم پرځای کړي
د چارو ادارې مسئولین وايي، نوی ولسمشر به د راتلونکې اوونۍ د دوشنبې په ورځ د لوړې مراسم پرځای کړي.
د چارو ادارې رئیس صادق مدبر وايی د ټاکنو د خپلواک کمیسیون د اعلان له مخې ډاکتر اشرف غني احمدزی د افغانستان منتخب ولسمشر او ډاکتر عبدالله عبدالله د اجرایوي رئیس په توګه ټاکل شوی دی.
د چارو ادارې رئيس صادق مدبر، چې د نوی ولسمشر د لوړې مراسمو ته د تیاري د کمیسیون ریاست هم ور په غاړه دی وايي:
ډاکتر اشرف غني احمدزی به د راتلونکې دوشنبې په ورځ (د تلې ۷) په ارګ ماڼۍ کې د لوړې مراسم پر ځای کړي او په رسمي توګه به د ولسمشرۍ په څوکۍ کښیني.
د نورو هېوادونو استازو ته، چې د لوړې دغو مراسمو ته راځي ځانګړي تدابیر په پام کې نیول شوي دي.
د لوړې له مراسمو وروسته به نوی حکومت جوړېږي، چې د دوو کسانو لخوا به رهبری کېږي. یو به ولسمشر وي او بل به د اجرایوي پوست واګې په لاس کې ولري.