سیمه ییز خبرونه
هرات لوبډلې د اته زونونو د فتبال سياليو د اتلولۍ جام پورته کړ
د افغانستان د اتو زونونو ترمنځ د فټبال په سياليو کي هرات لوبډلې د جمعې په ورځ(د وري۲) جوزجان لوبډلې ته په ماته ورکولو د دغه تورنامنت د اتلولۍ جام پورته کړ.
ياد تورنمنت ١٤ ورځې وړاندې پيل شوى و، چي په کي د هېواد په کچه د اته زونونو اتلو لوبډلو برخه اخستې وه او په دوه گروپونو کي د ولايتونو لوبډلو له يو بل سره سيالۍ وکړې.
د يادو سياليو نيمه پايلوبه د پنجشنبې په ورځ(د وري لومړۍ) وشوه، چي خوست لوبډلې له جوزجان او کندهار له هرات لوبډلې په پنالټي شوتونو کې ماته وخوړله او په دې توگه هرات او جوزجان د افغانستان د زونونو اتلوليو پايلوبي ته لار پيدا کړه.
دغه تورنمنت، چي د کندهار ولايتي ادارې په نوښت د دغه ولايت په احمدشاهي لوبغالي کي جوړ شوى و ټول لگښت يې ولايتي ادارې ورکړى او لوبغاړيو ته په فارغو ورځو کې د کندهار ولايت د بېلا بېلو تاريخي سيمو او ميله ځايونو ليدنه هم په برخه شوې ده.
کندهار والي د يادو شويو لوبو په پيل کي د افغانستان له فتبال فدراسيون څخه مننه کړې وه، چې:
کندهار ولايت ته يې د کوربتوب امتياز ورکړ او د سياليو د ښه قضاوت لپاره يې پر نړيوالو معيارونو خبر او روزل شوي ريفريان(حاکمان) رالېږلي دي.
هغه په فتبال لوبه کي د کندهار له ستورو او د بډاى تاريخ يادونه وکړه او نوي فتبالران يې متوجه کړل، چي تر هرڅه زيات يو ځل بيا د تېر تاريخ د راژوندي کولو لپاره مټې راونغاړي او سپورټي اخلاق غوره کړي.
د جمعې په ورځ د تورنمينت د پاى په مراسمو کي د بېلابېلو شرکتونو، سړيو او کړيو لخوا پر غوره لوبغاړيو او گټونکي تيم جايزې ووېشل شوې او د هرات تيم ته د افغان بيسيم مخابراتي شرکت لخوا د لوبو لپاره ځانگړى شوى موټر هم ډالۍ شو.
د بېلا بېلو دولتي ادارو لخوا په خپلو خپلو برخو کي همکارۍ او مرستې تر سره شوې او د لوبغاړيو د لوبو تر ترسره كيدو د عامي روغتيا رياست له روغتيايي څارنې، امبولانسونو او روغتيايي کارکوونکيو له شتون برخمن شول.
د افغانستان د زونونو د اتلو لوبډلو ترمنځ يادو لوبو ليدلو ته هره ورځ لس گونه زره د فتبال کندهاري مينوال راتلل او ټولې لوبډلې به يې د ښو لوبو له خاطره هڅولې.
د مينوالو راتگ او د افغانستان د بېلابېلو برخو د لوبغاړيو گډون يو ځل بيا دا په گوته کړه، چې د کندهار خلک له جنگ كركه لري او د سولي لپاره يې چټک گامونه پورته كړي دي.
د لوبو په پاى كې د افغان بيسيم مخابراتي شركت له لوري د لوبو ټولو گډونوالو ته د افغان بيسيم يو يو سيم كارت او يوه پايه مبايل ډالۍ شو.