هغه نشه یی توکی، چې په تخار، بغلان او بدخشان ولایتونو کې نیول شوي وو، وسوځول شول

هغه څه د پاسه اته ټنه نشه يي توكي وسوځول شول، چې په تخار، بغلان او بدخشان ولايتونو كې تر لاسه شوي دي. د بغلان او تخار واليان وايې، هڅه كوي د كوكنارو د لږو كروندو د له منځه وړلو له لارې په دې ولايتونو كې د كوكنارو له صفر ښكته درجه همداسې وساتي.

په بغلان كې  د كوكنارو كر صفر درجې ته نږدې دى، خو وېل كېږي په هغو سيمو كې، چې وسله وال واكمن دي، كوكنار كرل كېږي.

د بغلان والي سلطان محمد عبادي هغه دوه نيم ټنه نشه يي توكي وسوځول، چې په دې ولایت کې كشف شوي، خو له كوكنارو څخه په بشپړه توګه د دې ولايت د پاكولو په مقصد هڅې روانې دي.

تخار ته ورځو، چې له تاجكستان سره ګډه پوله لري، وېل كېږي له دې ولايت څخه تاجكستان ته نشه يي توكي قاچاق كېږي.

خو د تخار والي احمد فيصل بيك زاد وايې:

د قاچاقو مخه يې نيولې ده. په دې ولايت كې هم څه باندې يو نيم ټن تر لاسه شوي نشه يي توكي او الكولي مشروبات وسوځول شول.

بلخوا د كورنيو چارو وزارت د نشه يي توكو پر وړاندې د مبارزې مرستيال باز محمد احمدي د بدخشان له چارواكو سره په دې خبرې كوي، چې څرنګه په دې ولايت كې د كوكنارو د كر او قاچاق مخه ونيسي.

د بدخشان والي شاولي الله اديب وايې:

په يوولسو هغو ولسواليو كې، چې مخالفين او قاچاق وړونكي فعال دي، د كوكنارو كر په كې زيات شوى دى.

په بدخشان كې د نشه يي توكو د پروسيس كارخانې هم شته. په دې ولايت كې هم څه باندې څلور ټنه تر لاسه شوي نشه يي توكي وسوځول شول.

د افغانستان شمال ختيځ ولايت بدخشان له تاجكستان سره اوږده پوله لري او د نشه يي توكو د قاچاقو يوه عمده لار له همدې ولايت څخه تېرېږي.

سيمه ييز چارواكي په دې ولايت كې د ناامنيو پېښې د نشه يي توكو له كاروبار سره تړي او وايې، څو پورې، چې نشه يي توكي له منځه ولاړ نه شي، په بدخشان كې به امنيت ټينګ نه شي.