هند به د افغانستان د پوځيانو د پياوړتيا په اړه بې غوره پاتې نه شي

د هند د بهرنيو چارو وزارت مسوولين وايي:

د افغانستان پر اقتصادي وده به  ډېر تمركز وشي، خو له دې هېواد سره به د سياسي او امنيتي اړيكو په پراختيا كې هم لاس تر زنې نه كيني.

كابل په ۲۰۱۱ م كال كې د ستراتيژيكو همكاريو لومړنى تړون له هند سره لاسليك كړ.

ټاكل شوې، چې ولسمشر كرزى نن دوشنبه(د غويى۳۰) هند ته په درې ورځني رسمي سفر ولاړ شي او د كابل او نوي ډيلي د اړيكو پر پراختيا به له هندي چارواكو سره خبرې وكړي.

په ډيلي كې د افغانستان سفير ويلي:

افغان حكومت غواړي، چې هند له افغانستان سره پوځي مرستې پيل كړي.

د هند د بهرنيو چارو وزارت وياند اكبرالدين وايي:

هند چمتو دى، چې د پوځي تجهيزاتو په برخه كې د افغانستان پر غوښتنو بحث او غور پرې وكړي. افغانستان د هندوستان ستراتيژيک ملگرى هېواد دى او دواړه هېوادونه پر مهمو موضوعاتو د ستراتيژيک تړون د ميکانېزم له مخې خبرې کوي او دوى به د افغانستان غوښتنو ته ځواب ووايي. دا مهال هند د افغانستان پر اقتصادي پروگرامونو تمركز لري، خو په عين حال كې مونږ سياسي او امنيتي مسايل هم له پامه نه شو غورزولى.

د افغانستان د مشرانو جرگې غړى هدايت الله رهايي د هند له دې گام هركلى كوي؛ خو وايي دا اقدام به پاكستان را وپاروي او دا هېواد به د خطر احساس وكړي.

د سياسي چارو كارپوه وحيد مژده وايي:

پاكستان حق نه لري، چې د افغانستان په چارو كې لاسوهنه وكړي.

دا په داسې حال كې ده، چې د افغانستان، پاكستان او بريتانيا په وروستۍ درې اړخيزه سرمشريزه كې د پاكستان ولسمشر له بريتانيا غوښتي ول، چې په افغانستان كې د هند رول رالږ كړي.