سیمه ییز خبرونه
واشنګټن تهران ته د سولې ۱۵ مادهییز پلان وړاندې کړ
ټرمپ د سېشنبې پر ورځ ویلي؛ امریکا د هغه جګړې د پای ته رسولو لپاره “خبرې اترې” کوي، چې زرګونه کسان په کې وژل شوي او په تاریخ کې یې د تېلو او انرژۍ د کمښته تر ټولو بد ټکان ورکړیدی.
د راپورونو له مخې امریکا په منځني ختیځ کې د روانې جګړې همهاله تهران ته ۱۵ مادهییزه طرحه لېږلې ده.
ټرمپ د سېشنبې پر ورځ ویلي؛ امریکا د هغه جګړې د پای ته رسولو لپاره “خبرې اترې” کوي، چې زرګونه کسان په کې وژل شوي او په تاریخ کې یې د تېلو او انرژۍ د کمښته تر ټولو بد ټکان ورکړیدی.
د چارشنبې پر ورځ( د وري پېنځمه ) داسې راپورونه خپاره شول، چې امریکا د یوې میاشتې د اوربند په لټه کې دي او ایران ته یې د خبرو اترو لپاره ۱۵ مادهییزه طرحه لېږلې ده. له دې سره د ونډو بازارونه لوړ شول، بیې راټیټې شوې او له فارس خلیج څخه د تېلو د صادراتو د بیا پیل لپاره هیلې راوټوکېدلې.
ټرمپ په سپینه ماڼۍ کې خبریالانو ته ویلي، چې امریکا په ایران کې له ” مناسبو خلکو” سره د دښمنۍ د پای ته رسولو لپاره خبرې کوي او زیاتوي، چې ایرانیان یوې هوکړې ته د رسېدو لپاره ډېر لېواله دي.
د ایران د استازو جرګې رییس محمد باقر قالیباف د دوشنبې پر ورځ( د وري درېیمه ) دا ډول راپورونه “جعلي ” بللي او رد کړي دي.
نیویارک ټایمز د سېېشنبې پر ورځ راپور ورکړ، چې واشنګټن ایران ته په منځني ختیځ کې د جګړې د پای ته رسولو لپاره ۱۵ مادهییزه طرحه لېږلی ده.
د اسرائیلو ۱۲ کانال هم د درې سرچینو د څرګندونو له مخې راپور ورکړی، چې امریکا ۱۵ مادهییزه طرحه د یوې میاشتې د اوږده اوربند په اړه د بحث لپاره لېږلې ده.
د اسرائیلو رسنیو ویلي، چې دا طرحه د ایران د اټومي پروګرام له منځه وړل، د لبنان د حزب الله په څېر له نیابتي ډلو ملاتړ پای ته رسول او د هرمز تنګي بیا پرانیستل رانغاړي.