وسله والو طالبانو د بدخشان د كران او منجان ولسوالۍ نيولې ده

په ملي شورا كې د بدخشان استازي د طالبانو له خوا د بدخشان د کران او منجان د ولسوالۍ په نیولو اندېښمن دي او وایی، په دغه ولايت كې نا امنۍ ورځ تر بلې د پراخېدو په حال كې دي.

بدخشان د افغانستان په شمال ختيځ كې پروت ولايت دى، چې له دريو كلونو راهيسې د نا امنيو څادر پرې غوړېدلى دى.

له وردج وروسته كران او منجان هغه ولسوالي ده، چې طالبان پكې حاكميت لري.

په ملي شورا كې د بدخشان استازي اندېښمن دي، چې بدخشان د نا امنيو په خوا روان  دى.

د كورنيو چارو وزارت ویاند صدیق صدیقي وايي:

د كران او منجان ولسوالۍ پوليسو له وسله والو مخالفينو سره تر لنډې جګړې وروسته ولسوالۍ پرېښې ده.

د كورنيو چارو وزارت وياند ډاډ څرګندوي، چې دغې ولسوالۍ ته د تازه دمو سرتېرو له رسېدو سره به دغه ولسوالۍ بېرته ونيسي.

د بدخشان د والي وياند عبدالروف راسخ وايي:

اوس په كران او منجان كې سيمه ايزو خلكو او پخوانيو جهادي مشرانو د وسله والو طالبانو په وړاندې غبرګون ښودلى او په مخالفت كې يې ولاړ دي.

ويل كېږي، چې بدخشان ولايت ته د نورستان له برګمټال څخه وسله وال ورغلي او له وردج څخه د دولت د عملياتو په ترڅ كې ايستل شوي وسله وال هم ور سره يو ځاى شوي دي.

د كورنيو چارو وزارت مسئولين همدارنګه وايي، چې وسله وال طالبان هڅه كوي په بدخشان كې د نا امنيو له لارې ټول شمالي ولايتونه نا امن كړي.