ولسمشرحامد كرزي ته د هند په سفر كې افتخاري دوكتورا وركړ شوه

افغان ولسمشر حامد كرزي د هند له ال. پي. يو پوهنتون څخه افتخاري دوكتورا  تر لاسه كړه.

دغه مراسم د هندوستان د  پنجاب ايالت د جلندرښار په پوهنتون كې تر سره شوسي، چې د هند د ولسمشر پرتاب موكرجي په گډون په كې د پنجاب ايالت والي او د دغه پوهنتون استادانو او زده كوونكيو برخه اخيستې وه.

د هند ولسمشر پرناب موكرجي ويلي:

افغان ولسمشر حامد كرزي ته د دوكتورا دغه سند د افغانستان د ښوونې او روزنې، د بېخبناوو د جوړولو، روغتيا، اقتصاد او نړيوالو اړيكو په وياړ وركول كيږي.

په دې مراسمو كې د پنجاب والي حامد كرزى د هندوستان ستر ملگرى ونوماوه او ويې ويل، چې د پنجاب دا پوهنتون او خلك به د ده راتگ دې پوهنتون ته هيڅكله هم هير نه كړي.

ورپسې افغان ولسمشر حامد كرزي په خپلو خبرو كې وويل:

د وياړ ځاى دى، چې ال. پي. يو پوهنتون افتحارى دوكتورا را په برخه كړه.

ښاغلي حامد كرزى وايي:

هند د افغانستان د خلكو د ملگري په توگه افغانستان ته د نورو ډېرو مرستو تر څنگ افغان ځوانانو ته هر كال د زده كړو لپاره د ۲۰۰۰  بورسونو زمينه هم برابره كړې ده.

افغان ولسمشر زياته كړه، چې هند نه يوازې له افغان ځوانانو سره د ښوونې او روزنې په برخه كې مرسته كړې، بلكې د افغانستان د ودې او پراختيا په چارو كې يې هم مرستې كړې دي.

ويل كيږي، چې ال. پي. يو  پوهنتون د هند يو ستر ځانگړى پوهنتون دى، چې د هند د پنجاب ايالت په جلندر ښار كې موقعيت لري.

دغه پوهنتون وسمهال د هند له ۲۸ ايالاتونو او د نړۍ له ۲۶ هېوادونو څخه ۳۰ زره زده كوونكي لري.