تازه خبرونه
ولسمشر غني راشد خان ته د دولتي مډال سپارښتنه وکړه
د هېواد کرکټ بورډ نن (جمعه د مرغومي ۱۲) څرګنده کړې، چې ولسمشر غني د ولسمشرۍ ریاست دفتر ته سپارښتنه کړې، چې د کرکټ ملي لوبډلې لوبغاړي راشد خان ته د دولتي مډال د سپارلو بهیر پیل کړي.
دا په داسې حال کې ده، چې راشد خان په نړیوالو شل اوریزو لوبو کې د وروستي لسیزې غوره لوبغاړی پېژندل شوی دی.
څو ورځې وړاندې د هېواد د کرکټ بورډ مشر فرحان یوسفزي له ولسمشرۍ وغوښتل، چې راشد خان پر دولتي مډال ونازوي.
دغه راز کرکټ بورډ په کابل کې د راشد خان بریا ونمانځله او د هغه لاسته راوړنې یې وستایلې.
د هېواد سیاستوالو او ناټو هم راشد خان ته د وروستۍ لسیزې د غوره لوبغاړي په توګه د نوموړي ټاکل کېدل ستایلي او مبارکي یې ورته وړاندې کړې ده.
په هېواد کې ورزشکارانو ويلي، چې د راشد خان نړیوالې لاسته راوړنې د افغانستان په ځانګړي توګه د سپورت د ډګر لوی ویاړ دی.