ولسمشر غني د ملګرو ملتونو عمومي اسامبلې ته وینا کوي

ولسمشرۍ ویلي، ولسمشر غني به نن شپه دوه بجې وینا کوي او په خپله وینا کې به د ترهګرۍ پر وړاندې د امریکا او نورو هېوادونو پر همکاریو تمرکز وکړي او له نړۍ  به وغواړي، چې د ترهګرو ځالې په نښه کړي.

د ولسمشر د ویاند مرستیال دواخان مینه پال زیاتوي، چې ولسمشر به د ملګرو ملتونو د عمومي اسامبلې په څنډو کې د پاکستان له لومړي وزیر سره هم وګوري.

د بهرنیو چارو وزارت ویاند شکیب مستغني هم له افغانستان سره د نړۍ د هېوادونو د اقتصادي همکاریو پر ارزښت خبرې کوي او وایي، د بهرنیو چارو وزیر به د اقتصادي همکاریو او اسلامي سازمان په ناسته کې د افغانستان پر لومړیتوبونو او اقتصادي همغږۍ خبرې وکړي.

د ملګرو ملتونو عمومي اسامبله هر کال په نیویارک کې تر سره کیږي او په کې د نړۍ  پر مسایلو  بحثونه کیږي.

د ولسمشر غني وینا ته د ډېرو سترګې وراوښتي. 

دا سفر په داسې حال کې تر سره کیږي، چې افغانستان د امریکا د ولسمشر نوې تګلاره ستایلې، چې له مخې به یې پر وسلوالو مخالفینو په افغانستان کې بمبارد زیاتیږي، اضافي ځواکونه به را لیږل کیږي او همداسي د اربکیانو یو نوی ځواک به جوړیږي، چې په خپلو سیمو کې له طالبانو سره جګړه وکړای شي.

له ولسمشر سره په دې سفر کې د بهرنیو چارو وزیر صلاح الدین رباني، د ملي امنیت مشاور حنیف اتمر، د مالیې وزیر اکلیل حکیمي، په بېخبنایي چارو کې د ولسمشر سلاکار محمد شاکر کارګر او یو شمېر نور حکومتی چارواکي مل شوي دي.

خبریال: رفیع صدیقی