سیمه ییز خبرونه
ولسي جرګه غواړي د امنیتي تړون د لاسليک په باب لاسليکونه راټول کړي
په پام كې ده ولسي جرګه د چهار شنبې په ورځ ( د مرغومي ۲۵ ) د امنيتي سند د لاسليك د لانجې د حل لپاره لاسليكونه را ټول كړي.
د امنيتي تړون پر سر ناندريو په تېر يو كال كې د افغانستان د عامو خلكو افكار ځانته راړولي وو او مصروف يې ساتلي وو، دغه بهير تر يو ځاى د ولسي جرګې د غړو د صبر كاسه هم ډكه كړې ده.
په پام كې ده د چهار شنبې په ورځ په ولسي جرګه كې د دغه تړون د لاسليك په باب لاسليكونه را ټول شي.
د ولسي جرګې غړې فوزيه كوفي وايي، چې د ولسي جرګې د رهبرۍ پلاوي هم د ولسمشرۍ په شان په دغه سند كې د خپلو ګټو پالنه كوي.
په همدې حال كې د كابل پوهنتون استاد طاهر هاشمي بيا خبردارۍ وركوي، چې كه د افغانستان او امريكا تر مېنځ امنيتي تړون لاسليك نه شي نو افغانستان به يو ځل بيا د كورنيو جګړو له بحران سره مخ شي.
دا په داسې حال كې ده، چې د امريكا د بهرنيو چارو وزير ويلي وو؛ كه د كابل او واشنګټن تر مېنځ امنيتي تړون لاسليك نه شي، نو له ۲۰۱۴ كال وروسته به د افغانستان لپاره د توكيو او شيكاګو د ناستو ژمنې پلې نه شي.