تازه خبرونه
ولسي جرګې د افغانستان بانك د رئيس د استيضاح پرېكړه وكړه
ولسي جرګې د افغانستان بانک د رئیس د استیضاح پرېكړه وروسته له دې وكړه، چې د جرګې استجوابيه غونډې ته نورالله دلاوري ورنغى.
د ولسي جرګې غړي منورشاه بهادري،عارف رحماني او رمضان بشر دوست پر نور الله دلاوري نيوكې كوي، چې مديريت يي كمزورى دى او د قانون خلاف د بانك كاركوونكو ته لوړ معاشونه وركوي.
د ولسي جرګې غړی نقیب الله فایق پر نور الله دلاوري تور پورې كوي، چې دوه ګونى تابعيت لري او د هغه په خبره قصدا نه غواړي ولسي جرګې ته راشي.
د ولسي جرګې رئيس عبدالروف ابراهیمي استجوابيه غونډې ته د نور الله دلاوري نه ورتګ د خلكو استازو ته د سپكاوي په توګه تعبير او د هغه دا كړنه يي له قانون سرغړونه وبلله.
د افغانستان بانك د رئيس نور الله دلاوري د استيضاح لپاره د ولسي جرګې ۵۷ غړو لاسليكونه وكړل او اداري پلاوي ته يي وسپارل، چې له بهر څخه تر بېرته را ستنېدو وروسته نوموړى استيضاحيه غونډې ته را وغواړي.