سیمه ییز خبرونه
ولسي جرګې د كابينې څلور وزيران استيضاح كړل
د سوداګرۍ، اقتصاد، کانونو او اطلاعاتو فرهنګ وزیرانو د ولسي جرګې د دوشنبې ورځې ( د وري ۱۲ ) په استيضاحيه غونډه كې وويل، چې دوى له پنځوسو فيصدو زياته پرمختيايي بودجه لګولې ده.
كه څه هم د ولسي جرګې د پرېكړې له مخې د كابينې هغه وزيران بايد استيضاح شوي واى، چې ندي توانېدلي د ديارلس سوه نويم كال پرمختيايي بودجه له پنځوسو فيصدو لږه مصرف كړي، خو استيضاح شوي وزيران وايي:
دوى له پنځوسو فيصدو زياته پرمختيايي بودجه مصرف كړې ده.
د کانونو وزیر وحید الله شهرانی او د اقتصاد وزیرعبدالهادی ارغندیوال زیاتوې، چې په زياتره مواردو كې له دوى سره ژمنه شوې پېسې مرستندويانو په وخت نه دي وركړي.
د سوداګرۍ وزیر انوارالحق احدی او د اطلاعاتو فرهنګ وزیرسید مخدوم رهین وایی، چي دوى د ۱۳۹۰ كال اووه شپېته په سلو كې پرمختيايي بودجه مصرف كړې ده.
د وزيرانو څرګندونې د ولسي جرګې د غړو قناعت حاصل نه كړ، نو ولسي جرګې پرېكړه وكړه، چې په دې باب به د ماليې وزير د لا زياتو معلوماتو لپاره را وغواړي.
ټاكل شوې، چې د اوبو او انرژی، پوهنی له مخدره توکو سره د مبارزې وزیران به د چهارشنبی په ورځ ( د وري ۱۴ ) استيضاخ كړي.