سیمه ییز خبرونه
يوناما د ټاكنيزو كميسيونونو د ملاتړ پر اړتيا ټينگار وكړ
په داسې حال كې چې په ۳۱ ولايتونو كې د ټاكنيزو درغليو او سرغړونو ادعاوو ته په غبرگون كې د ټاكنو خپلواك كميسيون بيا د راى پاڼو شمېرل پيل كړي، د افغانستان لپاره د ملگرو ملتونو ځانگړي استازي له ټاكنيزو كميسيونونو څخه د ملاتړ پر اړتيا ټينگار كړى دى.
په افغانستان كې د ملگرو ملتونو د سياسي څانگې وياند نظيف الله سالارزى وايي، يان كوبيش د افغانستان د بشر د حقونو د خپلواك كميسيون له مشرې سره په ليدنه كې ويلي، چې د ټاكنو خپلواك كميسيون او د ټاكنيزو شكايتونو خپلواك كميسيون بايد په بشپړې روڼتيا او خپلواكۍ ټاكنيز شكايتونه او درغلۍ وڅېړي او پاكې رايي له ناپاكو بېلې كړي.
يان كوبيش همدا راز د ولسمشرۍ له كانديدانو غوښتي، چې د ټاكنو مشروع پايلې ومني او همدا راز يې د رايو پر شفافې شمېرنې ټينگاركړى دى.
د ولسي جرگې غړى فاروق نظري ټينگار كوي، چې په ټاكنو كې د خلكو پراخ حضور بايد ټاكنيزې سرغړونې او درغلۍ تر سيوري لاندې رانولي.
دوي وايي، ټاكنيز بنسټونه بايد خپلې چارې په روڼ ډول تر سره كړي، چې د ټاكنو مشروعيت تضمين شي.
كه څه هم د ټاكنو خپلواك كميسيون او د ټاكنيزو شكايتونو كميسيون پخوا ويلي، چې په ټاكنو كې زياته درغلي شوې؛ هيڅكله به اجازه ورنكړو، چې دا درغلي د يوه مشخص كانديد په گټه وشمېرل شي.