سیمه ییز خبرونه
يونسكو په افغانستان كې ۳ ميليون ماشومانو ته د زده كړې زمينه برابروي
يونسكو ژمنه كوي، چې تر ۲۰۱۵م كال پورې به هغه درې ميليون ماشومانو ته د زده كړې زمينه برابره كړي، چې په افغانستان كې له زده كړې پاتې دي.
د افغانستان د پوهنې وزير له خلكو وغوښتل، چې د خپلو اولادونو د تعليم په لاره كې همكاري وكړي.
د ملگرو ملتونو د فرهنگي ادارې يا يونسكو مشرې ايرينا باكوا د شنبه په ورځ(د غويى۲۸) په كابل كې د نجونو له يوې ليسې څخه د ليدنې په وخت په افغانستان كې د پوهنې پرمختگ د پام وړ وباله.
هغه زياتوي، چې اوس هم د ښوونې او روزنې په ډگر كې ډېرې ستونزې شته.
هغې د ښوونځيو بندوالى او د زده كوونكيو او په تېره بيا د نجونو د تعليم په وړاندې گواښ او په ځينو ځايونو كې ښوونځي ته د نجونو نه پريښودل د ستونزو په توگه يادوي.
د ملگرو ملتونو د فرهنگي ادارې يا يونسكو مشره ايرينا باكوا وويل:
مونږ يوه نړيواله ناسته لرو او هڅه كوو، چي ۶۳ سلنه په شرايطو برابرو ماشومانو ته د ښوونې او روزنې امكانات برابر او په ښوونځيو كې شامل كړو، چې يوازې درې ميليون يې په افغانستان كې دي.
د پوهنې وزير فاروق وردگ وايي:
د هېواد دښمنان د پوهنې په برخه كې شوي پرمختگونه نه شي زغملاى؛ نو له همدې كبله په بېلابېلو بڼو غواړي د دې بهيرپه وړاندې ستونزې جوړې كړي.
هغه له ميندو او پلرونو وغوښتل، چي ښوونځيو ته د خپلو اولادونو د تلو مخه ونه نيسي .
د پوهنې وزارت وايي، له هغو ۱۰۰۰ ښوونځيو، چې په هېواد كې د امنيتي ستونزو له كبله تړل شوي ول ۷۰۰ يې پرانيستل شوي او د پاتې نورو د پرانيستلو په موخه هم هڅې روانې دي.