ټاکنیزې ډلې او ګوندونه له واکه د اشرف غني د لیرې کولو هڅې کوي

د افغانستان حزب وحدت اسلامي په داسې حال کې غونډه رابللې، چې ټاکنې لانجمنې شوي او د هېواد سیاسي، امنیتي او ټولنیز حالات هم ترینګلي دي.

د پنجشنبې پر ورځ( د مرغومي ۵) د حزب وحدت اسلامي ګوند سیاسي غونډې ته راغلیو سیاستوالو او د ولسمشرۍ نوماندان په خپلو خبرو کې پر تر سره شویو ولسمشریزو ټاکنو راوڅرخیدل.

د ولسمشرۍ نوماند عبدالله عبدالله په خپلو خبرو کې یو ځل بیا ټینګار وکړ، چې د تقلب له لارې واک ته د اشرف غني رسیدل ناممکن دي.

د ولسمشریزو ټاکنو نوماند ګلبدین حکمتیارهم ويلي؛ اوسنی حکومت باید یوه داسې حکومت ته ځای پریږدي، چې د شفافو ټاکنو او سولې ملاتړ وکړي.

نوموړي زیاته کړې، چې د ټاکنو خپلواک کمیسیون د دوی رایې غلا کړي دي.

د نوموړي د څرګندونو له مخې؛ دوه یم پړاو ته د ټاکنو پر ځای باید ټولې رایې له سره وشمارل شي.

د حزب وحدت اسلامي رهبر او د سولې عالي شورا رييس محمد کریم خلیلي په لومړي ځل په ډاګه کړه، چې طالبان له اشرف غني سره هیڅ خبرو ته ندي حاضر.

سیاسي رهبران هم ټينګار کوي، چې محمد اشرف غني باید له واکه لرې شي.

د جمعیت اسلامي مرستیال احمد ضیا مسعود ویلي، مونږ کولی شو هغه له واکه لیرې کړو؛ یوه اوونۍ هم مقاومت نشي کولي.

د دولت جوړوونکې ټاکنډله دغه تورونه بیځایه ګڼي او ټينګار کوي، چې واک ته د رسیدو لار یوازې ټاکنې دي.