لوبی
پاکستان د قطر نړیوال جام د امنیت لپاره خپل سرتېري لیږي
Last Updated on: وږی ۳, ۱۴۰۱
د پاکستان کابینې د هغه تړون مسوده تصویب کړه، چې له مخې به یې د قطر فوتبال نړیوال جام د امنیت خوندي کولو لپاره خپل پوځیان واستوي.
د دې هوکړې مسوده قطر ته د پاکستان د لومړي وزیر شهباز شریف له رسمي سفر مخکې، چې د سې شنبې پر ورځ پیل شو، تصویب شوه.
تر اوسه څرګنده نده، چې دا تړون به کله لاسلیک شي او څومره پاکستاني پوځیان به قطر ته واستول شي.
د رویترز خبري آژانس د راپور له مخې؛ قطر د فوتبال نړیوال جام لپاره د امنیت په برابرولو کې له پاکستان څخه د همکارۍ غوښتنه کړې ده.
دغه سیالۍ به د روان کال د نومبر میاشتې په ۲۰ نېټه پیل شي.
له دې مخکې ترکیې په ډاګه کړې وه، چې قطر ته به د نړیوال جام د امنیت د خوندي کولو لپاره ۳۲۵۰ سرتېري واستوي او انقرې پدې برخه کې قطري پوځیان روزلي دي.