پر جلال آباد او مهترلام د برښنا د پرې کیدو نن ۱۶ ورځ ده

شپاړس ورځې وشوې، چې د مهترلام او جلال آباد پر اوسیدونکیو  د نغلو برښنا مزي  پرې شوې؛ جوماتونه بې غږه، فابرېکې بندې، په روغتونونو کې ناروغان په چغو او د قربانیو غوښې یې ورستې شوې دي.

په دې اړه د حکومت غلي پاتې کیدو او د سیمه ییزو چارواکو بې غورۍ د خلکو غصه راپارولې او پر ضد یې لاریونه پيل شوي دي.

پاڅونوال وايي، د ننګرهار والي او د برښنا رییس بې غوري، بې تفاوتي او چوپ پاتې کیدل  د دوی د بې کفایتۍ  او په دې کار کې له اقتصادي مافیا او وسلوالو مخالفینو سره  ښکېل کیدل یې ښکاره ثبوت دی.

د ننګرهار مدني فعالان دا کار د لغمان او ننګرهار له ولس سره لویه جفا بولي.

دوی د کابل- جلال آباد پرسړک د برښنا  د مزو غزولو، په ننګرهار کې د برښنا کوټونو د جوړولو او په ولایتي اداره کې د بدلون غوښتنې وړاندې کړي.

مدنی فعالانو د احتجاج په ډول د ولایتي مقام  مخې ته خیمه درولې ده.

د ننګرهارولایت مرسیتال محمد حنیف ګردیوال د دې ستونزې له حل ځان عاجز ګڼي او د ننګرهارله ولسي استازیو او مرکزي حکومته همکاري غواړي.

د لغمان او ننګرهار مطبوعاتي دفترونو په خپلو فسبوکپاڼو کې لیکلي، چې د شنبې د ورځې تر پایه به په بادپښ کې د برښنا ستونزه حل شي.

دا لومړی ځل نه دی، چې وسلوال طالبان مهترلام او جلال آباد ته د برېښنا تللي مزي په بادپښ کې پرې کوي، بلکې هره میاشت څو ځله دا کار کیږي او حکومت یې تراوسه پر دایمي حل نه دی بریالی شوی.

خبریال: رحمت الله زیارمل.