په افغانستان كې خبريالان له ستونزو سره مخ دي

د افغانستان له آزادو رسنيو څخه د ملاتړ اداره وايي:

ډېر لوړ پوړي  دولتي چارواكي حاضر نه دي، چې په آسانۍ  خبريالانو ته معلومات وركړي.

د افغانستان له آزادو رسنيو څخه د ملاتړ ادارې مشر صديق الله توحيدي وايي:

دغه اداره له عدليې وزارت څخه غواړي، چې معلوماتو ته د لاسرسۍ د قانون مسوده د اړوند بنسټونو له لارې ولسي جرگې ته د تصويب لپاره وليږي.

د عدليې وزارت د قانون جوړونې د عمومي انستيتوپ سرپرست عبدالروف هروي وايي:

پر دغه قانون اوس هم څېړنې روانې دي او له اړوند  وزارتونو سره له شريكولو وروسته به دغه قانون د روان لمريز كال تر پايه ولسي جرگې ته وليږل شي.

كه څه هم په دې ورستيو كې د اطلاعاتو او فرهنگ  وزارت  معلوماتو ته د لاسرسي قانون مسوده جوړه او عدليې وزارت ته ليږلې، خو تر اوسه دغه مسوده د تصويب لپاره ولسي جرگې ته نه ده رسيدلې.

د نى ادارې چارواكي د پرتو نادري د دوسيې تعقيب غير قانوني بولي او له اړوندو وزارتونو او بنسټونو څخه غواړي، چې د نوموړي د جلب امر لغوه كړي.

دغه بنسټ همدا راز له كورنيو چارو له وزارت څخه غواړي، چې خبريالانو ته د تخار د امنيه كوماندانۍ د سپكاوي موضوع هم وڅېړي.

د دغه بنسټ د چارواكو په وينا :

د تخار د امنيه كوماندان او خبريالانو تر منځ جنچال د دې لامل شو، چې د تخار خبريالان ولسمشر ته پرانستى ليك وليږي  او لا تر اوسه د تخار خبريالان له پوليسو سره اړوند خبرونه نه خپروي.

افغانستان په تېرو لس كلونو كې د رسنيو د پراخيتا په برخه كې د پام  وړ لاسته راوړنې درلودې، خو دغه لاسته راوړنې له زرگونه ننگونو سره  مخ وې.