سیمه ییز خبرونه
په افغانستان كې كورنيو او بهرنيو شركتونو سوداگريز بازار له ستونزو سره مخ كړى
د ځينو كورنيو او بهرنيو شركتونو انحصار، احتكار او د پيسو اوبولو كړنو په افغانستان سوداگريز بازار له ستونزو سره مخ كړى دى.
د افغانستان د ولسمشردوه يم مرستيال محمد كريم خليلي د دغه مطلب له څرگندولو سره وايي، چې:
د هېواد اقتصادي قوانين د اقتصادي بازار ځواب ويونكي نه دي او بايد سم شي.
كريم خليلي دغه راز په ډاگه كړه، چې:
د اقتصادي تگلارې او پانگوالو د امنيت د خوندي كولو پر چارو كار دوام لري .
په افغانستان كې ښه اقتصادي فرصتونه تل د سياسي او اقتصادي غونډو يوه مهمه موضوع گرزيدلې ده ، خو له يوې لسيزې ډېره موده كيږي، چې تراوسه هم له دې فرصتونو سمه گټه پورته شوې نه ده .
د افغانستان د ولسمشر دوه يم مرستيال محمد كريم خليلي د چارشنبې په ورځ(د سلواغې۱۸) په كابل كې له افغان پانگوالو سره په يوه ناسته كې وويل، چې:
دولت بايد سوداگرو او استفاده كوونكيو ته په بازار كې يو شان فرصتونه را منځته كړي.
نوموړي په اقتصادي برخه كې د قوانينو سختوالي ته په نغوته وويل، چې د افغانستان په بازارونو كې د انحصار او احتكار موجوديت ستونزې رامنځته كړې دي.
د ناامنيو په اړه د يو شمېر سوداگرو اندېښنه په افغانستان كې د پانگونې په وړاندې عمده ستونزه گڼل كيږي.
د ولسمشر دوه يم مرستيال ژمنه وكړه، چې دولت به د پانگوالو لپاره په ځانگړي توگه له ۲۰۱۴م كال وروسته خوندي شرايط برابر كړي.
له دې مخكې ولسمشر حامد كرزي هم د هېواد د ملي اقتصاد پر مديريت نيوكه كړې وه او ويلي يې ول، چې د آزاد بازار د اقتصادي سيستم په اړه بايد له سره كتنه وشي، ځكه د هغه په وينا دا سيستم د خلكو د ستونزو د حل جوگه نه دى.