سیمه ییز خبرونه
په افغانستان كې له حيواني محرقې سره د مبارزې كمپاين پيل شو
د كرنې وزارت له دولس كالونو وروسته د كابل ولايت په پغمان ولسوالۍ كې له حيواني ناروغۍ بروسلوز سره د مبارزې كمپاين پيل كړ.
د كرنې وزير محمد آصف رحيمي وايي:
دغه ناروغي هر كال ډېر څاروې وژني.
د كرنې وزير زياتوي، چې د دې ناروغۍ په وړاندې د مبارزې په موخه د حيواناتو گڼ داكتران او د پوهاوي ډلې د هېواد يو شمېر ولايتونو ته ليږل شوي، چې خلك د خپلو څارويو واكسين ته وهڅوي.
دغه ناروغي د نيم خامو شيدو او يا هم د نيم خامې غوښې د خوړلو له لارې له حيواناتو څخه انسانانو ته هم ليږديږي.
د كرنې وزارت يوه سروې، چې په ۱۳۸۹ل كال كې تر سره شوې ښيي، چې په ټول افغانستان كې شاوخوا ۳۰۱۵ تنه په بروسلوز ناروغۍ اخته دي.
د بروسلوز په وړاندې د مبارزې كمپاين به تر راتلونكيو شپږ كلونو پورې هر كال د يوې مياشتې لپاره د هېواد په بېلابېلو ولايتونو كې تر سره كيږي، چې د څارويو نوى نسل د دغې ناروغۍ په وړاندې واكسين شي.
د كرنې وزارت دغه دوه كلنه سروې ښيي، چې د بروسلوز ناروغي د هېواد په گڼو ولايتونو كې شتون لري. دغه ناروغې د غواوو د محرقې په نوم هم ياديږي او مالدارن ورته گڼ نور نومونه هم لري.