تازه خبرونه
په افغانستان کې جنګ د پاکستان د استخباراتو دی
سنا: د امنیتي بنسټونو سرپرستان په خپلو کارونو کې ډېر کمزوري دي
د مشرانو جرګې یو شمېر غړي وايي، که حکومت د ناامنیو د کابو کولو لپاره جدي هڅې ونه کړي، د ناامنیو د پراختیا ویره ده.
دوی وایي، د کابینې په اعلام کې ځنډ د ناامنیو یو سبب دی او سرپرست وزیران په ځانګړې توګه د امنیتي بنسټونو سرپرستان په خپلو کارونو کې ډېر کمزوري دي.
د مشرانو جرګې دا غړي ټینګار کوي چې هېواد کې روانه جګړه د پاکستان د څارګرې ادارې له خوا تنظیمیږي. د مشرانو جرګې غړي په حکومت له دې امله نیوکه کوي چې د پاکستان په وړاندې یې جدي غبرګون نه دی ښودلی.
په همدې حال کې د مشرانو جرګې ځینې نور غړي وایي، که حکومت د پاکستان د لاسوهنو په وړاندې جدي دریځ ونه نیسي، او همداسې چوپتیا ته دوام ورکړي، هېواد به کله هم په تلپاتې سولې لاس رسی پیدا نه کړي.
بلخوا د مشرانو جرګې رییس وایي، حکومت باید د امنیت د ټینګښت او ښه حکومت کولو په برخه کې خلکو ته کړې ژمنې عملي کړی.
د مشرانو جرګې غړي ټینګار کوي چې د ملي یووالي حکومت باید په یوې ملي امنیتي تګلارې کار وکړي، او هغه امنیتي پرواګرامونه وارزوي چې د هېواد د امنیت د ټینګښت لپاره اغیزناک تمامیدای شي.