د فراه ولایت په ختیځ کې پر زر جریبه ځمکې د مسافرو او باروړونکو موټرو لپاره د یوه ستر او معیاري تمځای د جوړولو چارې پیل شوې، چې د لومړي پړاو لګښت یې ۱۲۷ میلیون افغانۍ ښودل شوی دی.

د ټرانسپورټ او هوايي چلند وزارت چارواکو ویلي، د دې پروژې له بشپړېدا سره به د مسافرو د تګ راتګ ستونزې راکمې، د باروړونکو موټرو لپاره به لازمې آسانتیاوې برابرې او د فراه ښار ټرافیکي ګڼه ګوڼه کمه شي.

د چارواکو د څرګندونو له مخې، دا تمځای د تېلو زېرمه، مسافرخونه، دوکانونه، اداري ودانۍ، جومات او شنه سیمه هم لري.

د ټرانسپورټ او هوايي چلند وزارت مالي او اداري مرستیال حافظ صدیق‌الله عابد د پروژې د پرانیستې پر مهال ویلي، چې فراه د سیمه‌ییزو لارو یو مهم مرکز دی او د دې تمځای جوړېدل به د ټرانسپورټي خدمتونو د ښه‌والي او اقتصادي فعالیتونو د پیاوړتیا لپاره مهم رول ولوبوي.

چارواکي زیاتوي، چې دغه تمځای د فراه هوايي ډګر ختیځ لوري کرجي سیمې ته نږدې جوړېږي، چې ۳۰۰ جریبه ځمکه یې د مسافرو موټرو او ۷۰۰ جریبه یې د باروړونکو موټرو لپاره ځانګړې شوې ده.

د نورستان ولایت په مرکز پارون کې د ویجاړوونکو سېلابونو له راوتلو وروسته د نړۍ چارواکو، مرستندویو بنسټونو او د افغانستان یو شمېر څېرو له لوري د خواخوږۍ او ملاتړ ګڼ پیغامونه خپاره شوي دي.

په کابل کې د جاپان سفیر، اروپایي ټولنې، د ایران سفارت، د افغانستان په چارو کې د بریټانیا ځانګړي استازي ریچارډ لینډزي او د کډوالۍ نړیوالې ټولنې د دې پېښې له کبله خواشیني څرګنده کړې، د قربانیانو له کورنیو سره یې خواخوږي ښودلې او له زیانمنو شویو سره یې د مرستو او ملاتړ پر دوام ټینګار کړی دی.

دغه راز د افغانستان پخواني ولسمشر حامد کرزي له ملي سوداګرو او مرستندویو بنسټونو غوښتي، چې د نورستان له سېلاب ځپلیو سره د مرستې لپاره بېړني ګامونه پورته کړي.

همدارنګه د افغانستان کرکټ ملي لوبډلې ستوري راشد خان د قربانیانو له کورنیو سره د خواخوږۍ ترڅنګ له ملي او نړیوالو بنسټونو، خیریه ټولنو او شتمنو هېوادوالو غوښتي، چې د خوراکي توکو، درملو، سرپناه او نورو اړینو مرستو پر برابرولو د دې پېښې له زیانمنو شویو ملاتړ وکړي.

په زیانمنو سیمو کې د لټون، ژغورنې او د اوښتو زیانونو د ارزونې چارې اوس هم روانې دي.

د پېښو پر وړاندې د مبارزې ملي چمتووالي ادارې ویلي، د تازه لومړنیو معلوماتو له مخې؛ د نورستان ولایت په مرکز پارون کې د ویجاړوونکو سېلابونو له کبله ۲۳ کسان مړه، ۸۰ نور ټپیان او نږدې ۱۰۰ کسان ورک دي.

د یادې ادارې مرستیال ویاند تاج محمد همت ویلي، چې تر اوسه د ۱۵ کسانو جسدونه له خاورو او خټو را ایستل شوي او د لټون او ژغورنې عملیات روان دي.

د نوموړي د څرګندونو له مخې، سېلابونو اووه کورونه بشپړ او ۲۳ نور نسبي ویجاړ کړي دي. همدارنګه، ۷۰ دوکانونه، ۴۰ سپک او درانده موټرونه او ۱۱ هوټلونه هم بشپړ نسبي زیانمن شوي دي.

چارواکو ټینګار کړی، چې دا شمېرې لومړنۍ دي او د لټون د عملیاتو او د زیانونو د ارزونې له دوام سره ښایي د قربانیانو شمېر او د اوښتو زیانونو کچه نوره هم لوړه شي.

د پاکستان جمعیت علمای اسلام مشر مولانا فضل‌الرحمن د اسلام‌آباد پر سیاستونو نیوکه کړې او څرګندوي، چې پاکستان د امریکایي ځواکونو د حضور پر مهال د هوايي ملاتړ د برابرولو لپاره پر افغانستان د امریکا بریدونو ته زمینه برابره کړې وه.

نوموړي همدارنګه ادعا کړې، چې پاکستان هیڅکله افغانستان ته د وسلوالو کسانو د تګ راتګ مخه نه‌ده نیولې او تل یې د دغه هېواد په بدلونونو کې خپل رول لوبولی دی.

فضل‌الرحمن د خپلو خبرو په لړ کې ټینګار کړی، چې افغانستان ثبات، خپلواکۍ او آرامۍ ته اړتیا لري؛ خو د نوموړي د څرګندونو له مخې: هر کله، چې امریکا یا لویدیځو هېوادونو د افغانستان د بې‌ثباته کولو هڅه کړې؛ پاکستان د «نیابتي ځواک» په توګه رول ترسره کړی دی.

هغه زیاته کړې، چې اسلام‌آباد په ورته وخت کې ځان د ترهګرۍ ضد مبارزې مدعي هم بولي.

د جمعیت علمای اسلام مشر د دیني مدرسو د ثبتولو په اړه د پاکستان د حکومت پر تګلارې هم نیوکه کړې او خبرداری یې ورکړی، چې دا چلند ښایي د ترینګلتیاوو او اعتراضونو لامل شي.