تازه خبرونه
په بدخشان كې پوليس د وسله والو پرضد د مبارزې توان نه لري
د بدخشان امنيتي چارواكي وايي، چې پوليس په يوازې توگه په دغه ولايت كې د وسله والو پرضد د مبارزې توان نه لري.
د بدخشان والي شاه ولى الله اديب وايي، د دغه ولايت په يمگان، جرم، تگاب او كشم ولسواليو كې امنيتي ارگانونه د دولت له وسله والو مخالفينو سره په جگړه كې ښكېل دي.
هغه زياتوي، په دې كسانو كې معمولا فراري مجرمين او هغه كسان جذب شوي، چې د قانون له منگولو څخه تښتيدلي دي.
نوموړي په ډاگه كړې، چې طالبان له بېلابېلو لارو او صرافيو خپلې اړتياوې پوره كوي.
صرافان د والي دا څرگندونې نه مني او وايي:
والي بايد د ثبوت لپاره سند وړاندې كړي.
د بدخشان د ولايتي شورا غړى ذبيح الله عتيق وايي، وسله وال طالبان په دغه ولايت كې ورځ تربلې پياوړي كيږي.
هغه زياتوي، وسله وال د دوه ولسواليو لارو ته گواښ دى او لارې تړلې دي.
د بدخشان امنيه قوماندان فضل الدين عيار وايي، چې د دغه ولايت د يمگان او كران منجان ولسواليو لارې د وسله والو له خوا بندې شوي.
هغه په ډاگه كړه، له بدخشان څخه د وسله والو ويستل د ملي دفاع په وزارت پورې اړه لري. هغه وايي، پوليس په يوازې توگه د وسله والو په وړاندې د مبارزې توان نه لري.
په بدخشان كې د وسله والو طالبانو د فعاليتونو تر ټولو نوې پېښه د يمگان ولسوالۍ پر ودانې بريد دى، چې په كې يو پوليس وژل شوى دى.
چارواكي وايي، په دې بريد كې څلور وسله وال هم وژل شوي دي.