سیمه ییز خبرونه
په بلخ كې نا معلومو وسله والو د يوه خصوصي شركت درې كاركوونكي وژلي دي
په بلخ كې نا معلومو وسله والو د سړك جوړونې د يوه خصوصي شركت درې كاركوونكي وژلي او درې نور يې ټپيان كړي دي. دا پېښه د بلخ په دولت آباد ولسوالۍ كې شوې ده.
د بلخ امنيه قومندان محمد سالم احساس وایی:
وړمه شپه نا معلومو وسله والو كسانو د بلخ ولايت په دولت آباد ولسوالۍ كې د سړك جوړونې د يوه خصوصي شركت په كاركوونكو بريد كړى، درې كسان يې وژلي او درې نور یی ټپيان کړي دي. په وژل شويو كې يو پاكستاني تبعه دى.
د نوموړي په وېنا پوليسو هغه درې وسله وال طالبان نيولي، چې د ماين په چاودنو كې يې سيمه یيزو پوليسو ته تلفات اړولي وو.
وسله والو طالبانو د يوې خبر پاڼې په خبرولو سره د بلخ په چمتال ولسوالۍ كې د ماين په چاودنه كې د سيمه یيزو پوليسو د وژنې مسئوليت منلى و.
چمتال د بلخ هغه ولسوالي ده، چې وخت ناوخت د نا امنيو رپوټونه ترې را رسېږي. تر دې مخكې نا معلومو وسله والو كسانو د ښوونځي څو ښوونكي په ډزو وژلي وو.