تازه خبرونه
په بلخ کې ترکیې، ایران او پاکستان خپلې قونسلګرۍ وتړلې
سیمه ییزو چارواکو ویلي؛ د بلخ ولایت په ځینو ولسوالیو کې د جګړو له پراختیا وروسته د ترکیې، پاکستان او ایران کونسلګريو خلکو ته د ویزو ورکړه درولې او خپل دیپلوماټان یې کابل ته ور غوښتي دي.
بلخ یو مهم سرحدي ولایت دی او له همدې کبله یوشمېر هېوادونو په کې کونسلګرۍ لري؛ خو په وروستیو ورځو کې د مزار شریف ښار تر دروازو د جګړې رسېدو ایران، ترکیه او پاکستان اړ کړل، چې افغانانو ته د ویزو د ورکړې خدمتونه ودروي او په خپلو هڅو کې د پام وړ کموالی راولي.
د بلخ والي محمد فرهاد عظیمي ویلي، چې دوی د دغو هېوادونو ډیپلوماټیکو استازولیو د امنیت ساتنې ډاډ ورکړی و؛ خو هغوی له حالاتو اندېښمن ول او د ویزو د ورکړې بهیر یې درولی او ډیپلوماټان یې هم له بلخ وتلي دي.
سرچینو ویلي، چې د ازبکستان، قزاقستان او ترکمنستان کونسلګریو هم په بلخ کې افغانانو ته د ویزو د ورکړې خدمتونه محدود کړي دي.
خلک وایي له دې سره یې ستونزې ډېرې شوي دي.
د ازبکستان کونسلګري هم د ګرځندوی وېزې محدودې کړي دي.
دغه راز د حیرتان بندر هم دوه اوونۍ مخکې د مسافرو پر مخ بند و، خو د سوداګریزو توکو لېږدول ریل، بړۍ او لوړ تناژ لرونکي وسایط ترسره کوي.
دا په داسې حال کې ده، چې د بلخ ولایت د سیاسي ګوندونو مسوولینو او استازیو ولسي پاڅون نومې پوځي شورا جوړه کړې ده.
د جمعیت اسلامي د یوې څانګې مشرعطا محمد نور د دې شورا مشر ټاکل شوی.
نوموړی وایي، چې ولسي پاڅونوال اړ دي، چې د دولتي ځواکونو تر څنګ د مزارشریف ښار ساتنه وکړي او د طالبانو د بریدونو پر وړاندې ودریږي.
هغه وایي، چې پاڅونوال باید د له لاسه وتلو سیمو بېرته نیولو لپاره هم ډاډمن ګامونه پورته کړي.
په بلخ کې د وسلوالو طالبانو پرمختګونو د سیاسي ګوندونو مشران اړ کړي چې د مزار شریف ښار دفاع لپاره یوه چاره پیدا کړي. دوي د عطا محمد نور کور کې ټول شوي، او د ملي پاڅون پوځي شورا جوړېدو خبر یې ورکړ.
د ولسي پاڅون پوځي شورا مشر عطا محمد نور ویلي، چې د بلخ او نظام دفاع ته یې ټټر وهلی؛ خو په وینا یې په مرکز کې ځینې کسان ورته خنډونه جوړوي.
د بلخ والي فرهاد عظیمي د ناستې تالار ته نږدې د چاودنې په اړه ویلي، چې طالبانو پر ډرون کمرې دا برید کړی، چې په کې څلور ساتوونکي ټپیان شوی دي.
د بلخ والي دا هم ویلي، چې طالبانو له دې مخکې هم د شاهین قول اردو له انګر او نورو سیمو څخه پر ډرون کمرو انځورونه اخیستي دي.