سیمه ییز خبرونه
په بگرام زندان كې ټولې دوسيې غيرقانوني او ډېري كسان بيگناه د بند شپې تېروي
د بگرام په زندان كي د افغان زندانيانو د دوسيو د څېړنې كميټه وايي، چې د افغانستان د نافذه قوانيو پر بنسټ د بگرام په زندان كې ټولې دوسيې غير قانوني دي او ډېري كسان بيگناه د بند شپې تيروي.
د بگرام زندان، چې په افغانستان كې د ميشتو بهرنيو ځواكونو په ولكه كې و ، په كې گڼ شمېر كسان د وسلوالو مخالفينو او ترهگرو په نوم بنديان شوي ول. افغان دولت له سپارل كيدو وروسته په ياد زندان كې د بنديانو د دوسيو د څيړلو په موخه يوه كميټه وټاكله.
د بگرام زندانيانو د دوسيو د څېړنې كميټې غړى عبدالشكور دادرس وايي، چې:
په بگرام زندان كې د ډېرو بنديانو دوسيې قانوني نيمگرتياوې لري او د افغانستان د نافذه قوانينو له مخې هيڅ قاضي د دغو كسانو په اړه پرېكړه نه شي كولى.
ښاغلي داد رس زياتوي، تر اوسه د ۵۱۹ بنديانو دوسيې څېړل شوي او پرېكړه شوې، چې څلور سوه دريدېرش تنه بايد خوشي شي او يوازې د شپږ اتيا كسانو دوسيې لويې څارنوالۍ ته ليږل كيږي.
د هغه په وينا، تراوسه ۱۰۸ كسان له څېړنې وروسته له بند څخه خوشي شوي او دغه لړي روانه ده .
د بگرام زندانيانو د دوسيو د څېړلو كميټه وايي، اوسمهال د بگران په زندان كې د ۸۹ نورو بنديانو دوسيي تر څېړلو لاندې دي او دغه لړي دوام لري. دوى ډاډ څرگند كړ، چې ډېري كسان به په قانوني ډول له بنده خوشي شي.