تازه خبرونه
په تاشکند کې د افغان ترانس پروژې د اوسپنې پټلۍ د همغږۍ ګډ دفتر پرانیستل شو
د ازبکستان په پلازمېنه تاشکند ښار کې د افغان ترانس پروژې د اوسپنې پټلۍ د چارو د همغږۍ ګډ دفتر پرانیستل شو.
د دغه دفتر د پرانیستې مراسم، چې د جمعې پر ورځ ( د غویی دوهویشتمه ) په تاشکند کې ترسره شول د افغانستان د اوسپنې پټلۍ ادارې عمومي رییس ملا بخت الرحمن شرافت او د افغانستان او پاکستان سفیرانو په کې ګډون کړی و.
د افغانستان د اوسپنې پټلۍ ریاست په ډاګه کړې، چې په دې دفتر کې به د افغانستان، پاکستان او ازبکستان استازي په ګډه د افغان- ترانس پروژې چارې له همدې دفتره همغږي کوي، همداراز په پام کې ده د همدې پروژې یو دفتر په کابل او بل اسلامآباد کې هم فعال شي.
همدارنګه په دې ګډه ناسته کې پرېکړه وشوه، چې د اوسپنې پټلۍ لوړپوړیو مسوولینو بله ناسته به راتلونکې زېږدیزه میاشت په اسلام آباد کې جوړېږي.
دغه راز د ریلي همکاريو پر پیاوړتیا او د حیرتان- مزارشریف اوسپنې پټلۍ له لارې د سوداګریزو توکو د انتقالاتو پر ډېروالي هم بحث وشو.
یادونې ده، چې د افغان ترانس اوسپنې پټلۍ پروژه د افغانستان له خاورې پر تېرېدو، د منځنۍ آسیا هېوادونه له جنوبي آسیا سره نښلوي.