په تېرو دوه کلونو کې له ۱۰۰۰ ډېر کسان د ناچاودو ماینونو قرباني شوي – اوچا

په افغانستان کې د بشري مرستو د همغږۍ دفتر (اوچا) ويلي، په ټول هېواد کې هره میاشت چاودېدونکي توکي ۱۱۰ کسان وژني.

اوچا په یوه راپور کې ویلي، چې تېر کال د دغو قربانیانو ۸۹ سلنه ماشومان ول.

په دې راپور کې راغلي، چې له ۱۹۸۹ ز. کال راپدیخوا په افغانستان کې ۴۵ زره کسان د ځمکنیو ماینونو او ناچاودو توکو د پاتې شونو قرباني شوي دي.

دې دفتر زیاته کړې، چې د ملګرو ملتونو د ماین پاکۍ د خدمتونو دفتر په افغانستان کې تر ۲۰۲۴ ز. کال پورې د خپلو فعالیتونو د دوام لپاره د بودجې له کمښت سره مخ دی.

اوچا وايي، که په هېواد کې د ماین پاکۍ چارې تمویل نشي؛ په افغانستان کې به د ۳ اعشاریه ۴ میلیون وګړو ژوند له خطر سره مخ شي.

په دې راپور کې ویل شوي، چې افغانستان یو له هغو هېوادونو دی، چې تر ټولو ډېر پر ځمکنیو ماینونو او د جګړې له پاتې شونو ککړ دی او دا د بیارغونې او ثبات د ټینګښت لپاره د پام وړ خنډونه جوړوي.

د اوچا په راپور کې دا هم راغلي، چې په ټول افغانستان کې یو اعشاریه دوه میلیون مربع مټره ځمکه له ځمکنیو ماینونو، ناچاودو توکو ککړه شوې ده.

اوچا ويلي، چې د افغانستان په ککړو ځمکو کې ٢٦٢ ولسوالۍ دي، چې تعليمي ادارو او د اوبو سرچينو ته نږدې سيمې رانغاړي.

د دغه راپور له مخې؛ د ۲۰۲۲ ز. کال له جنورۍ څخه د ۲۰۲۴ کال تر فبرورۍ پورې، د دغو توکو او د جګړې د پاتې شونو د چاودنې په پایله کې ۱۴۰۱ کسانو خپل ژوند له لاسه ورکړی، چې ۸۶ سلنه یې ماشومان ول.

د ملګرو ملتونو د بشري مرستو د همغږۍ دفتر د دغو پېښو یو مهم عامل په افغانستان کې د پیسو پیدا کولو لپاره د فلزي ټوکو راټولول ګڼي.

ویل کیږي، چې د دې راپور پر بنسټ له تېر کال څخه راپدیخوا په هېواد کې ۸۸ سلنه پېښې له جګړو څخه له پاتې چاودېدونکیو توکو څخه رامنځته شوې دي.

اړوند خبرونه: 

بسپنه ورکوونکیو افغانستان ته پر ۶ سلنه بودجې هوکړه وکړه – اوچا