په خوست كې د روږدو كسانو د درملنې شل بستريز روغتون جوړشو

په خوست كې پر نشه يي توكو د روږدو كسانو د درملنې لپاره د شل بستريز روغتون نوې ودانۍ جوړه او گټې اخيستو ته وسپارل شوه.

دغه روغتون د خوست ښار د لوديځ   لوري  اداري كمپلېكس ته څېرمه جوړ او د جمعې په ورځ(د وږي ۸) يې د پرانستې په مراسموكې د خوست والي عبدالجبارنعيمي وويل، چې:

دغه روغتون به ټولنې ته غوره خدمتونه وړاندې او په ښه توگه به د روږدو کسانو درملنه كوي.

ده له ديني عالمانو، مشرانو او رسنيو وغوښتل، چې د نشه يي توکو د استعمال، توليد او قاچاق په اړه د ټولنيز او اسلامي مسووليت له مخې د خلکو ذهنونه روښانه کړي.

په خوست كې د نشه يي توكو پرضد د مبارزې رييس ميرناگل تڼيوال وايي، چې:

كه څه هم دلته د کوکنارو کښت صفردى، خو بيا هم د بېلابېلو لاملونو له مخې روږدي كسان شته او اړتيا ده، چې  د درملنې لپاره يې مجهز روغتون وي.

ده زياته كړه، چې دغه روغتون په شپږ جريبه ځمکه كې جوړ او د نرينه او ښځينه وو د درملنې ځانگړې څانگې، لابراتوارونه او نورې ټولې آسانتياوې لري.

په غونډه كې ميرمنو د ټولنې له هرفرد څخه وغوښتل، چې د نشه يي توکو د مخنيوي لپاره گډه مبازره وکړي او ځان، کورنۍ او چاپېريال ترې پاک وساتي؛ ځكه  د عام  ولس انداېښنه دا ده، چې اوس هم د خوست په هره سيمه كې په لسگونه نوي ځوانان د نشه يي توكو كارولو ته مخه كوي او لامل يې هم بي كاري او په ټولنه كې د  گڼو  نشه يانو شتون او هم  په  آسانۍ د نشه يي توكو تر لاسه كيدل په  گوته كيږي.

دوى له دولت گيله لري، چې  نه يوازې د شرابو او نورو الكولي مشروباتو مخنيوى نه كوي، بلكې د دولت يو شمېر لوړ پوړي مسوولين يې هم كار وي.  ښه ثبوت يې  د ماليې وزيرهغه تورونه دي، چې د ولسي جرگې پر ځينو وكيلانو يې لگولى دي.

پر دې پروژې، چې دولس ميليون او يو سلو ديارلس زره افغانۍ لگېدلي، د نشه يي توكو په وړاندې د مبارزې وزارت له خوا وركړشوي دي.