په خوست ولايت كې عدلي، كشفي او امنيتي ارگانونو د همغږۍ غوښتنه وكړه

د خوست څارنوالۍ مسوولين وايي، چې:

په قضايي برخه كې به تر هغې د ولس ستونزې حل نه شي، چې عدلي، كشفي او امنيتي ارگانونه سره په يوه خوله نه شي.

د خوست په مرافعه څارنوالۍ كې د جمعې په ورځ(د وږي۱۵) د امنيتي او عدلي ارگانونو ترمنځ په  دې موخه ناسته و شوه، چې په راتلونکې کې به په گډه د تورنو كسانو پردوسيو داسې ډول كار كوي، چې هيچاته په كې د پيسو يا رشوت اخيستو چانس برابرنه شي؛ ځكه، چې په دوسيو كې د ستونزو او نيمگړتياوو شتون اداري فساد ته لار برابروي.

د خوست د مرافعې څارنوال محمد شعيب ثابت وويل، چې د مجرمينو يا  تورونو كسانو د دوسيو  له ښه تنظيم سره به د اداري فساد مخه ونيول شي او هم به په کارونو کې چټکتيا راشي.

د غونډې گډونوال څارنوال عبدالمهيمين ساپي وويل، چې د تورنو كسانو په دوسيو كې د  نورو  ارگانونو غلطۍ د دې لامل كيږي، چې ډېر وخت د مجرم او بي گناه توپير يا هيڅ كيږي نه  او يا هم  په  سختۍ كيږي، خو كه د عدلي، كشفي او امنيتي مسوولينو تر منځ په رښتيا همغږي راشي؛ نو ډېرې ستونزې به اوارې شي.

څو ورځې وړاندې په خوست كې د يو تن د علني محكمې پرمهال د څارنوال په دوسيه كې له يو احتطاف كوونكي سره  د هغه د څو نورو ملگرو نومونه هم  ياديدل؛ خو په محكمه كې له يو پر ته نور تورن  تر سترگو نه شول.

دا ډول كړنې په دوسيو كې د ستونزو او نيمگړتياوو ښه  ثبوت كيداى شي؛ ځكه د هېواد په كچه له عدلي او قضايي ارگانو ډول ډول شکايتونه کيږي، خو د دغو ارگانونو چارواکي دا تورونه بي ځايه او ځانونه  سپين بولي.