تازه خبرونه
په زابل كې وسلوالو طالبانو څلويښت ښوونځي تړلي دي
د زابل ولايت چارواكي وايي، ښوونكيو ته د وسلوالو طالبانو د پرلپسې گواښونو په پايله كې د دې ولايت ۴۰ ښوونځي تړل شوي او وسلوال غواړي په دې كار په خلكو كې د نالوستۍ كچه پراخه كړي.
شاهجوۍ د زابل یوه هغه ناامنه ولسوالي ده، چې د تېرې یوې نیمې میاشتې راهیسې په کې ښوونیز بهیر په ټپه ولاړ دی.
د زابل مرستیال او سرپرست والي محمد جان رسولیار وایي:
طالبان غواړي د دې ولایت تنکي ماشومان په نالوستۍ کې رالوی کړي، چې په راتلونکي کی هغوی هم د خپل وطن په ورانولو کی برخه واخلي.
د سیمي ځایی اوسیدنکي هم د دې ستونزې یادونه کوي او زياتوي، چې ماشومان یې په کورنو كې ناست دي او د سیمې ښوونځي ټول تړل شوي دي.
یاد اوسیدونکي وایي:
طالبانو دغه کار د موټرسیکلونو د بندولو په غبرگون کې کړى دى.
د ځایي اوسیدونکيو په وینا، که دولت موټر سایکلونو ته اجازه ورکړي؛ نو دغه ستونزه به اواره شي.
له دې وړاندې هم وسله والو طالبانو د ولسوالیو د لويو لارو پر موټرونو بندیز لگولى و، چی اوس هغه ستونزه تر یوه بریده اواره شوې ده. که څه هم چارواکي وایي د دې ستونزې د اوارولو لپاره هلې ځلې کوی؛ خو تردي مهاله کومې پایلې ته رسیدلي نه دي.