په سلو كې پنځوس تاوتريخوالى د افغانستان په ۱۷ ولسواليو كې كېږي

په كابل كې د آيساف عملياتي قوماندان وايي، وسله والو طالبانو د افغانستان ۱۷ ولسوالۍ نا امنه كړې دي.

په افغانستان كې د ترهگرۍ په وړاندې د نړيوالو ځواكونو د ماموريت د پاى ته رسېدو په درشل كې اوس هم په دغه هېواد كې نا امني دوام لري.

په افغانستان كې د آيساف عملياتي قوماندان آدم فيندلي وايي:

طالبان تر اوسه هم د خلكو لپاره گواښ دى او نيمايي دا گواښونه په سويلي او ختيځو ولايتونو كې دي.

نوموړى همدارنگه زياتوي، چې په سلو كې پنځوس تاوتريخوالى د افغانستان په ۱۷ ولسواليو كې كېږي، چې ډېرې يې په ختيځ او سويل كې دي، د طالبانو تاوتريخوالى دغه راز د كابل ولايت هم گواښي.

هغه زياتوي، د افغان ځواكونو د سمبالتيا په نوې تگلاره كار كوي. د دې تگلارې له مخې افغان ځواكونه به پرمخ تللو وسلو سمبالېږي.

نوموړي په ډاگه كړه، چې اوس زموږ تگلاره داده، چې د افغان ځواكونو روزنه د ټولي او كنډك له كچې لوړه كړو، چې پېچلي عمليات هم اجرا كړي. افغان ځواكونه اوس د انكشاف په حال كې دي. په اوسني حال كې شل سلنه عمليات آېساف پرمخ وړي، تاسو بايد ډاډه كړو د ناټو ځواكونوعمليات له افغانانو سره په همغږۍ او گډه سرته رسېږي.

د آيساف قومانداني وايي، په تېرو يوولسو كلونو كې  د يو ميليارد ډالرو په ارزښت د وسلو، نقليه واسطو او اړيكو د وسايلو په شمول ۲۵۰ بېلابېل  وسايل افغان ځواكونو ته پېرودل شوي دي.

آيساف دغه راز زياتوي، چې له ۲۰۱۴م كال وروسته افغان ځواكونو ته د پرمختللو جنگي وسايلو د چمتو كولو په اړه بحثونه دوام لري.