تازه خبرونه
په سیرالیون کې د تېلو ټانکر له چاودنې ۹۱ کسان مړه شوي
د سیرالیون په پلازمېنه فریټاون کې د تېلو ټانکر له چاودنې لږ تر لږه ۹۱ کسان مړه او له ۱۰۰ ډېر نور ټپیان شوي دي.
دغه پېښه تېره ورځ له يوې ترافيکي پېښې وروسته رامنځته شوې ده.
د سیرالیون چارواکو تر اوسه په رسمي توګه د وژل شویو شمېر ندی تائید کړی؛ خو د فریټاون ایالت د مرکزي کنګلخونې چارواکو ویلي، چې دوی ته تر ۹۱ کسانو پورې مړي رالېږدول شوي دي.
د سرالیون د روغتیا وزارت مرستیالې آمارا جامبای رویټرز خبري سرچینې ته زیاته کړې، چې ۱۰۰ نور ټپیان روغتونونو ته د درملنې لپاره لېږدول شوي دي.
ویل کیږي، چې قربانیان د تېلو ټانکر له ټکر وروسته د تېلو د راټولولو لپاره راټول شوي وه.
له دې مخکې هم د آفریقا په صحرا کې د تېلو ټانکر د ټکر له کبله په لسګونه کسان، چې د تېلو راټولولو لپاره راټول شوي وه؛ مړه شوي دي.