سیمه ییز خبرونه
په غزني كې د بهرنيو ځواكونو بمبارد مرگ و ژوبله رامنځته كړې
په غزني ولايت كې افغان او ناټو ځواكونو له طالبانو سره نښته كړې، ۹ طالبانو او يو شمېر ولسي وگړيو ته يې مرگ و ژوبله اړولې ده.
امنيتي سرچينو په ډاگه كړې، چې:
د غزني ښار د پېنځه كيلومترۍ په اسفنده سيمه كې د شنبې په سهار(د وري۱۰) لومړى د عامه نظم د ساتنې د پوليسو تر منځ نښته رامنځته شوه، چې بيا وروسته ناتو هوايي ځواك سيمه بمبارد كړه.
د غزني ولايت د امنيه كوماندانې امنيت آمر محمد حسن وايي:
طالبانو د دوه موترو څخه په گټه پورته كولو غوښتل د پوليسو د عامه ساتنې پر قطعې بريد وكړي.
نوموړي وويل:
د بهرنيو ځواكونو په بمبارد كې د يوې سراچې او يو فلنكوچ ۹ تنه طالبان ووژل شول.
د دغې پېښې د ولسي وگړيو اته تنه ټپيان د درملنې لپاره د غزني روغتون ته ليږدول شوي دي.
د غزني روغتون رييس وايي:
د درې تنو روغتيايي حالت د اندېښنې وړ دى.
ټپيان او عيني شاهدان وايي:
د ناتو په هوايي بريد كې څه ناڅه ۲۰ ولسي وگړي وژل شوي دي.
د دوى په وينا، د پېښې قربانيان ډېري هغه ماشومان دي، چې ښوونځي ته د تگ په لاره ول او دوه ښځې هم ورسره وژل شوې دي.
د غزني ولايت سيمه ييز چارواكي د ولسي وگړيو دغه تلفات نه مني؛ خو ويلي يې دي، چې دوه ماشومان وژل شوي او اته نور ولسي وگړي ټپيان دي.