په غزني ولايت كې اقتصادي او ټولنيزو ستونزو رواني ناروغۍ رامنځته كړي

په غزنې كې د راواني ناروغيو معالج  داكتران وايي:

هغه كسان، چې كورنى تاوتريخوالى، ځانوژنې او يا ځان سوزونه كوي ډېر يې په رواني ناروغيو اخته دي.

دغزني ولايت داكټران په دې اند دي، چې:

د تاوتريخوالي، ځانوژنې او ځان سوځونې د پېښو په اړه د رپوټونو خپرول په خلكو كې د دې پديدې د زياتوالي لامل كيږي.

د غزني په ملكي روغتون كې د روانې ناروغيو داكتران وايي:

بېوزلي، نالوستي، د نفوس زياتوالى، جگړه او نا امني هغه عوامل دي، چې له كبله يې ډېر خلك په رواني ناروغيو اخته كيږي.

په غزني كې د روږدو د درملنې روغتون رييس داكتر وارث  وايي:

كورنى تاوتريخوالى، ځان وژنې او ځان سوزونې او  نشه يي توكو ته ډېر هغه كسان لاس اچوي، چې په رواني ناروغيو اخته شوي دي.

په مقر ولسوالې كې د روانې ناروغيو د مشورې مسووله نظيفه خاكسار وايي:

كه خلك خپل راتلونكي او د ژوندانه  ښه والي ته هيله من شي؛ نو د دا ډول پېښو كچه به هم راټيټه شي .

له بلې خوا د غزني د ولايتي روغتون رييس باز محمد همت وايي:

د تاوتريخوالي، تېري، وژنې، ځانوژنې او ځان سوزونې د رپوټونو خپرول دا ډول پديده  نوره هم زياتوي.

هغه ټينگار كوي، چې:

د افغانستان د خلكو د پوهې كچه دومره نه ده، چې له دې رپوټونو پند واخلي.

دا په داسې حال كې ده، چې په تېرو دوه مياشتو كې د غزني ولايت د ښځو په وړاندې د تاوتريخوالي، قتل، جنسي تېري او وهلو ډبولو پېنځه پېښې ثبت شوې دي.