سیمه ییز خبرونه
په فاریاب کې خلک د خپلو لانجو او دعواګانو د حل لپاره د طالبانو صحرایی محاکمو ته ورځی
په فارياب كې قومي مشران وايي، چې د دغه ولايت په ادارو كې د پراخ اداري فساد له كبله خلك د خپلو لانجو او د عواګانو د حل لپاره د وسله والو طالبانو صحرايي محاكمو ته ورځي.
اداري فساد هغه ستونزه، چې د هرې ورځې په تېريدو يې د جرړو د غښتلي كېدو رپوټونه خپرېږي.
د فارياب د ولايتي شورا منشي عبدالباقي او ځینې قومی مشران وايي، چې په دغه ولايت كې د اداري فساد له كبله خلك دولتي ادارو ته نه ورځي او د خپلو دعواوو او لانجو د حل لپاره د طالبانو صحرايي محاكم غوره بولي.
دوى نيوكه كوي، چې له اداري فساد سره د مبارزې لپاره جوړې شوې څو ادارې په خپلو چارو كې پاتې راغلي او نه دي توانېدلي، چې د اداري فساد مخه ونيسي.
تر دې مخكې د فارياب والي محمد الله بتاش هم په دغه ولايت كې د پراخ اداري فساد په باب څرګندونې كړي.
د هغه په وېنا له اداري فساد سره تر كلكي مبارزې پرته په هېواد كې سوله نه شي ټينګېداى.
هغه له خلكو غواړي، چې د مفسدو كسانو په پېژندلو او عدلي ارګانونو ته د هغوى په ور معرفي كولو كې ور سره مرسته وكړي.