سیمه ییز خبرونه
په كابل ښار كې د تهيه مسكن روزنتون د بيات بنياد له ژمنيو مرستو برخمن شو
د بيات بنياد مرستې، چې د ژمي له را رسيدو پيل شوي تر اوسه د پلازمېني په گډون د هېواد په څو ولايتونو كې وېشل شوي او د ژمې تر پايه به دوام وكړي.
د كابل ښار په تهيۀ مسكن روزنتون كې داځل ژمنۍ مرستي د بياد بنياد د بنسټ ايښودونكي، د دغه بنسټ د كاركوونكيو، د كار او ټولنيزو چارو شهيدانو او معلولينو د وزارت د معين او د تهيه مسكن روزنتون د چارواكو په شتون كې ووېشل شوې.
په ټولنه كې هغه ماشومان د نورو په پرتله ډېر د مرستو او همكارۍ مستحق دي، چې د كورنۍ له سرپرستۍ بې برخې دي.
د بياد بنياد لوى مشر سناتور انجنير احسان الله بيات او ورسره د بيات بنياد د پروژې اصلي چلوونكې فاطمه ليا بيات د دغو مرستو د وېش پر مهال په اوسنيو شرايطو كې له دغو بې سرپرسته ماشومانو سره مرستي اړينې وبللې او ژمنه يې وكړه، چې دا لړى به دوام وكړي.
د كار او ټولنيزو چارو وزارت معين واصل نور مومند له دغو بې سرپرسته ماشومانو سره مرسته د هر افغان دنده وبلله او له ملي سوداگرو يې وغوښتل، چې له دوى سره مرستو ته ور ودانگي.
د دغه روزنتون زده كوونكيو د بياد بنياد له خوا له دوى سره د شويو مرستو له كبله خوښي څرگنده كړه او له نورو مرستندويه بنسټونو څخه يې وغوښتل، چې له دوى سره دي ورته مرستي وكړي.
بيات بنياد هر كال د هېواد په بېلابېلو برخو كې له زرگونو ځوانانو او ماشومانو سره د خوراكي توكو، كاليو، وزرشي لباسونو، بوټونو او درسي توكو مرسته كوي.
د تهيه مسكن روزنتون يو له هغو بنسټونو څخه دى، چې هر كال په بېلابېلو مناسبتونو كې د بياد بيناد له خوا مرسته تر لاسه كوي.